யாரும் குர்ஆனைத் தொடலாம், படிக்கலாம் தடையில்லை

இறுதித் தூதராக முஹம்மத் நபி (ஸல்) அவர்கள் அகில உலகத்திற்கும் தேர்ந்தெடுக்கப்பட்டதிலிருந்து, அவர்களுக்கு இறக்கியருளப்பட்ட குர்ஆனும் அகில உலகத்திற்கும் பொதுவானது என்பது தெளிவாகிவிட்டது. அதனை குர்ஆன் பல இடங்களில் அறிவிக்கிறது:

'இந்த குர்ஆன் முழு மனித சமுதாயத்திற்கும் வழிகாட்டி. சத்தியத்தையும், அசத்தியத்தையும் அது பிரித்தறிவிக்கிறது.' (அல்-குர்ஆன் அத்தியாயம் 2 ஸூரத்துல் பகராவின் 185வது வசனம்).

இதே கருத்துடைய வசனங்கள் அருள்மறை குர்ஆனின் கீழ் குறிப்பிட்ட அத்தியாங்களில் உள்ளன: 3:138, 38:87, 68:52, 81:27.

இந்த குர்ஆனுடைய போதனை நாத்திகர்களுக்கும், யூதர்களுக்கும், கிறஸ்தவர்களுக்கும், சிலையை வணங்குபவர்களுக்கும், ஆண்களுக்கும், பெண்களுக்கும் பொதுவானது. உலகிலுள்ள 600கோடி பேர்களில் 200 கோடி பேர் முஸ்லிம்கள். மீதமுள்ள 400 கோடியும் முஸ்லிம் அல்லாதவர்கள்தான். அவர்களும் இறை நேசம் பெற வேண்டுமானால் குர்ஆனை படித்தாக வேண்டும். பிரச்சாரத்தின் மூலம் குர்ஆனை கொண்டு போகலாம் என்பது பொருந்தாத வாதம்.

பிரச்சாரத்தின் மூலம் குர்ஆனடைய வசனங்களில் சிலவற்றை பரவலாக கொண்டு போக முடியுமேத் தவிர, மொத்த குர்ஆனையும் கொண்டு போக முடியாது. குர்ஆனைப் படிக்கத் துவங்கினால்தான் மொத்த குர்ஆனுடனும் ஐக்கியமாகி புரிந்து கொள்ள முடியும். அதற்கு தங்கு தடையை குர்ஆன் ஏற்படுத்தவில்லை. முஸ்லிம் அல்லாதவர்களே எந்த சந்தர்ப்பத்திலும் குர்ஆனைத் தொடலாம்.

புடிக்கலாம். சிந்திக்கலாம் என்றாகிவிடும் போது - இறை நம்பிக்கையாளர்களான முஸ்லிம்களுக்கு இதில் எந்தத் தடையும் இருக்க முடியாது.

தூய்மையானவர்களைத் தவிர வேறு எவரும் இந்த குர்ஆனை தொடக் கூடாது என்று நபி (ஸல்) அவர்கள் கூறியுள்ளதாக சில அறிவிபப்புகள் உள்ளன. அந்த அறிவிப்புகளின் தரம் எப்படிப்பட்டது என்பதை காண வேண்டும்.

1. குளிப்பு கடமையானவர்கள், மாதவிடாய் ஏற்பட்ட பெண்கள், குர்ஆனிலிருந்து எதையும் ஓதக் கூடாது என்று நபி (ஸல்) சொன்னதாக இப்னு உமர் (ரலி) அறிவிக்கிறார்கள். அபுதாவூத், திர்மிதி, இப்னுமாஜாவில் இந்த செய்தி இடம் பெறுகிறது.

இந்த ஹதீஸை அறிவிப்பவர்களின் தொடரில் 'இஸ்மாயில் பின் அய்யாஸ்' என்ற ஒருவர் இடம் பெறுகிறார். இவர்; ஹிஜாஸ்வாசிகளிடமிருந்து கேட்டு அறிவிப்பவை பலவீனமான செய்தியாகும். இந்த செய்தியை 'மூஸா பின் உக்பா' என்ற ஹிஜாஸ்வாசி வழியாகவே இவர் அறிவிக்கிறார். எனவே இந்த ஹதீஸ் பலகீனமானதாகும். இந்த ஹதீஸை ஏற்கத் தேவையில்லை என்று அஹ்மத் பின் ஹம்பல் (ரஹ்) அவர்கள் அறிவிக்கிறார்கள்.

இந்த ஹதீஸின் கருத்து போன்றே தாரகுத்னியின் ஒரு ஹதீஸ் வருகிறது. அந்த ஹதீஸின் அறிவிப்பாளர் தொடரும் பலவீனமானது.

2. நபி(ஸல்) அவர்கள் மலஜலம் கழித்த பின், குர்ஆன் ஓதுவார்கள். எங்களுடன் மாமிசம் உண்பார்கள். ஜனாபத் (பொருந்தொடக்கு) தவிர வேறெதுவும் குர்ஆன் ஓதுவதிலிருந்து அவர்களை தடுக்காது என்று அலி (ரலி) அவர்கள் அறிவிக்கிறார்கள். அபூதாவூத், இப்னுமாஜா, நஸயி, திர்மிதி, பைஹகி போன்ற நூல்களில் இந்த செய்தி வருகிறது.

இமாம் ஷாஃபி அவர்கள் இந்த ஹதீஸை மறுக்கிறார்கள். ஏனெனில் இந்த ஹதீஸின் அறிவிப்பாளர் தொடரில் இடம்பெறும் அப்துல்லாஹ் பின் ஸலாமா என்பவர்தான். இவருக்கு வயதான காலத்தில் நினைவு தடுமாற்றம் ஏற்பட்டு விட்டது. இந்த ஹதீஸை முதுமையில்தான் அறிவிக்கிறார் என்று ஷிஃபா அவர்கள் கூறுகிறார்கள். இதே காரணத்திற்காகத்தான் இமாம் ஷாஃபி அவர்களும் இந்த ஹதீஸை மறுக்கிறார்கள். அஹ்மத்,

அத்தாபி, நவவி போன்ற அறிஞர்களும் அந்த ஹதீஸஸ விமரிசித்து உள்ளார்கள். எனவே இந்த ஹதீஸ்; பலவீனமானதாகும்.

3. நபி (ஸல்) அவர்கள் எமன் நாட்டவருக்கு எழுதிய கடிதத்தில் 'தூய்மையானவர்களைத் தவிர, மற்றவர்கள் குர்ஆனைத் தொடக் கூடாது' என்று குறிப்பிட்டார்கள். அமீருப்னு ஹஸ்மு (ரலி) மூலம் ஹாக்கிம், தாரகுத்னி, நூல்களில் இந்த செய்தி வருகிறது. இந்த செய்தியில் ஸுவைத் பின் அபீஹாத்திம் என்பவர் வருகிறார். இவர் பலகீனமான அறிவிப்பாளர். இவர் இடம்பெறும் ஹதீஸ்கள் அனைத்துமே பலகீனமாகும்.

நஸயீயில் இடம்பெற்ற ஹதீஸில் ஸுலைமான் பின் அர்கம் என்பவர் வருகிறார். ஹதீஸ்கலை அறிஞர்கள் அனைவருமே இவரையும் பலகீனமான அறிவிப்பாளர் என்று ஒப்புக் கொண்டுள்ளனர். எனவே இந்த செய்தியும் பலகீனமாகும். (ஒரு ஹதீஸ் எப்படி பலகீனப்படுகிறது என்பதை 'ஹதீஸ்கள் பலவீனப்படுமா?. எப்படி?.. என்ற கட்டுரையில் சுருக்கமாக விளக்கியுள்ளோம். படித்து பாருங்கள்).

ஆக துய்மையானவர்களைத் தவிர வேறு யாரும் குர்ஆனைத் தொடக்கூடாது என்று நபி (ஸல்) அவர்கள் சொன்னதாக வரும் செய்திகள் எதுவும் நிரூபிக்கப்பட்டதாக இல்லை. இவற்றை வைத்து எந்தச் சட்டமும் எடுக்க முடியாது.

இனி அல்-குர்ஆனின் 56வது அத்தியாயம் ஸூரத்துல் வாகியாவின் 79வது வசனத்திற்கு வருவோம்.

இந்த வசனத்தை எடுத்துக் காட்டியும், 'தூய்மையானவர்களைத் தவிர வேறு யாரும் குர்ஆனைத் தொடக்கூடாது' என்று சிலர் வாதிடுகின்றனர். எனவே அதுபற்றியும் முழுமையாக அறிவது அவசியம்.

'நிச்சயமாக இது மிகவும் கண்ணியமும், சங்கையும் மிக்க குர்ஆனாகும். பாதுகாக்கப்பட்ட ஏட்டில் இது இருக்கின்றது. தூய்மையானவர்களைத் தவிர இதனைத் தொடமாட்டார்கள்.' (அல்-குர்ஆன் அத்தியாயம் 56 ஸூரத்துல் வாகிஆ வின் 77, 78, 79ஆம் வசனங்கள்).

இந்த வசனத்தில் இடம் பெறும் 'தூய்மையானவர்கள்' யார்? என்பதையும், அதனைத்தொடமாட்டார்கள் என்பதில் வரும் 'அதனை' என்பது எது என்பதையும் விளங்கிக் கொண்டால் தெளிவு கிடைத்துவிடும்.

'அதனை தொடமாட்டார்கள்' என்கிறான் இறைவன். இது குர்ஆனை குறிப்பதாக இருந்தால் 'தொடக் கூடாது' என்ற கட்டளை மனிதர்களை முன்னிலைப் படுத்தி குறிப்பிடப் பட்டிருக்க வேண்டும். கட்டளையாக வராமல் 'தொடமாட்டார்கள்' என்று படர்க்கையாக 'செயல்வினைச்சொல் பயன்படுத்தப் பட்டுள்ளது. அதாவது இனி நடக்க வேண்டிய ஒரு காரியத்தைப் பற்றி இறைவன் பேசாமல், ஏற்கெனவே நடந்து கொண்டிருக்கும் ஒரு விஷயம் பற்றி பேசுகிறான்.

தொடமாட்டார்கள் என்பது மனிதர்களை குறிப்பதாக இருந்தால் அந்த வசனம் அர்த்தமில்லாமல் போகிறது. எப்படி?.

ஒளு செய்துவிட்டு தொடுவதுதான் தூய்மை என்றால் - ஒளுவும், தொழுகையும் நபி (ஸல்) அவர்களின் 52வது வயதில்தான் கடமையாகிறது. அதாவது திருக்குர்ஆனின் வசனங்கள் நபி (ஸல்) அவர்களின் 40வயதாக இருக்கும்போது வஹியாக வரத்துவங்கியது. அவ்வாறு வஹியாக வரத்துவங்கி 12 ஆண்டுகளுக்குப் பிறகுதான் ஒளுவும், தொழுகையும் கடமையாகிறது. அப்படியெனில் குர்ஆன் வஹியாக வரத் துவங்கி 12 ஆண்டுகள் வரை

நபித் தோழர்கள் அசுத்தமான நிலையிலேயே குர்ஆனை பதிவு செய்துள்ளார்கள் என்ற பொருள் வருகிறது. மேற்கண்டவாறு விளங்கினால் அந்த வசனம் சொல்லும் கருத்துக்கு அர்த்தமில்லாமல் போகிறது.

'இனி தொடமாட்டார்கள்' என்ற கருத்தில் அந்த வசனம் வந்திருக்கிறது என்று எவராவது சொன்னால், இந்த வசனம் இறங்கிய பிறகாவது நபித்தோழர்கள் ஒளு செய்துவிட்டு வந்துதான் வஹியை - குர்ஆனை பதிவு செய்தார்கள். நபி (ஸல்) இப்படித்தான் இந்த வசனத்தை விளக்கினார்கள் என்பதற்கு ஆதாரம் காட்ட வேண்டும். எந்த ஹதீஸ் நூலிலும் இதற்கான ஆதாரம் கிடைக்கவில்லை.

எனவே 'தொடமாட்டார்கள்' என்பது மனிதர்களை குறிப்பதற்கு வாய்ப்பேயில்லை. மனிதர்களை குறிப்பதாக இருந்தால் 'தொடக்கூடாது' என்ற கட்டளை வந்திருக்க வேண்டும் என்பதையும் நாம் கவனத்தில் கொள்ள வேண்டும்.

'அதனை' என்பது என்ன?.

'அதனை' என்பதற்கு குர்ஆன் என்று பொருள் கொண்டால் - குர்ஆன் தொடக்கூடிய வடிவத்தில் இறங்கியிருக்க வேண்டும். குர்ஆன் தொட்டு உணரக் கூடிய நூல் வடிவத்தில் இறங்கவில்லை. மாறாக ஓதி அறியக்கூடிய 'வஹி' யாகத்தான் இறக்கியருளப்பட்டது. அதற்கு ஆதாரமாக அருள்மறை குர்ஆனின் கீழ்கண்ட வசனங்கள் உள்ளன.

'இறைவனின் கட்டளைப்படி ஜிப்ரீல் இதனை உம்முடைய உள்ளத்தில் இறக்கி வைத்தார்.' (அல்-குர்ஆன் அத்தியாயம் 2 - ஸூரத்துல் பகராவின் 97வது வசனம், அத்தியாயம் 26 ஸூரத்துஷ் ஷூஃராவின் 192வது வசனம்).

'(நபியே!) நாம் உம்மை ஓதி காட்டச் செய்வோம் பிறகு நீர் மறக்கமாட்டீர்' (அல்-குர்ஆன் அத்தியாயம் 87 ஸூரத்துல் அஃலாவின் 6வது வசனம்)

மேற்படி வசனங்கள் குர்ஆன் நபி (ஸல்) அவர்களின் உள்ளத்தில் வஹியாக அறவிக்கப்பட்டதேத் தவிர ஏடாக வரவில்லை என்பதை அறிவிக்கிறது.

'எழுதப்பட்ட வேதத்தை நாம் உம்மீது இறக்கியிருந்தால் அதை தமது கரங்களால் தொட்டுப் பார்த்து இது வெறும் சூனியமேத் தவிர வேறில்லை என்று கூறியிருப்பார்கள்.' (அல்-குர்ஆன் அத்தியாயம் 6 ஸூரத்துல் அன்-ஆம் 7வது வசனம்)

இந்த வசனத்தின் மூலம் குர்ஆன் ஒரு எழுதப்பட்ட ஏடாக வரவில்லை என்பதை தெளிவாக அறிந்து கொள்ளலாம்.

ஓசையும் - உச்சரிப்பாகவும் மட்டும்தான் குர்ஆன் வஹியாக அருளப்பட்டது. ஓசையையும், உச்சரிப்பையும் - யாராலும் தொட முடியாது. அப்படியானால் 'அதனை' என்று தொடக் கூடிய வடிவத்தில் இருக்கும் ஒன்றைத்தான் இறைவன் கூறியிருக்க முடியும். குர்ஆன் தொடக் கூடிய வடிவத்தில் இறைவனிடமிருந்து இறங்கவில்லை என்பதால் 'அதனை' என்பது குர்ஆனை குறிக்காது என்பதை தெளிவாக அறிந்து கொள்ளலாம்.

தூய்மையானவர்கள் என்றால் யார்?.

இஸ்லாமிய மொழி வழக்கில் அதாவது குர்ஆன் - ஸூன்னா வழியில் தூய்மை என்பது பல அர்த்தங்களில் வந்துள்ளது.

உள்ளத்தூய்மை, ஒளு, மாதவிடாய் மற்றும் பிரசவத் தீட்டிலிருந்து தூய்மை அடைதல், தீய காரியங்களிலிருந்து விலகி நிற்றல் என்று ஏராளமாக சொல்லலாம். இதில் எதுவும் நாம் மேற்குறிப்பிட்ட வசனத்திற்கு பொருந்தாது. ஏனெனில் 'அதனை' என்று குர்ஆன் அல்லாத ஒன்றை இறைவன் சொல்வதால் இந்த அர்த்தங்கள் அங்கு பொருந்தாது.

இப்போது இந்த வசனத்தின் வரலாற்றுப் பின்னனியை அணுகினால் முடிவான விடை கிடைத்துவிடும்.

இறைத்தூதர் முஹம்மது நபி (ஸல்) அவர்கள் மக்காவில் ஏகத்துவ பிரச்சாரம் செய்தபோது எதிரிகளால் பல 'சொல்' தாக்குதலுக்கு உள்ளானார்கள். அதில் ஒன்று 'ஷைத்தான்கள் இவருக்கு கற்றுக் கொடுப்பதைதான், இவர் மக்களுக்கு ஓதிக் காட்டுகிறார்' என்பதாகும்.

மேற்படி 'சொல்' தாக்குதலை மறுத்து இரண்டு வசனங்கள் இறங்கின.

'இதை ஷைத்தான்கள் இறக்கிவைக்கவில்லை. அது அவர்களுக்கு தகுதியானதுமல்ல. அதற்கு அவர்கள் சக்தி பெறவும் மாட்டார்கள்.' (அல்-குர்ஆன் அத்தியாயம் 26 ஸூரத்துஷ் ஷுஃராவின் 210 மற்றும் 211ஆம் வசனங்கள்)

'இது கண்ணியமிக்க குர்ஆனாகும். பாதுகாக்கப்பட்ட (லவ்ஹூல்- மஹ்ஃபூல்) என்னும் ஏட்டில் அது இருக்கிறது. தூய்மையானவர்(மலக்கு)களைத் தவிர வேறு யாரும் அதனை (லவ்ஹூல்- மஹ்ஃபூல் என்ற மூல ஏட்டை) தொடமாட்டார்கள்.' (அல்-குர்ஆன் அத்தியாயம் 56 ஸூரத்துல் வஆகியா 77 முதல் 79வது வசனம் வரை)

மக்காவில் உள்ள இறை நிராகரிப்பாளர்களின் குற்றச்சாட்டுக்கு மறுப்பாக நீங்கள் கூறுவது போல் ஷைத்தான்கள் இதனை இறக்கவில்லை. அதை இறக்கக் கூடிய சக்தி அவர்களுக்குக் கிடையாது. பாதுகாக்கப்பட்ட மூல ஏட்டிடம் ஷைத்தான்கள் நெருங்க முடியாது. பாவம் என்றால் என்னவென்றே அறியாத 'தூய்மையான மலக்குகளைத் தவிர வேறு எவரும் 'அதனைத் தொடமாட்டார்கள்' என்று இறைவன் தெளிவாக அறிவித்து

விட்டான். இப்னு அப்பாஸ் (ரலி) ஸயீத் பின் ஜூபைர் (ரலி), அனஸ் (ரலி) போன்ற நபித்தோழர்கள் அனைவரும் மேற்கண்ட விளக்கத்தையே கொடுகத்துள்ளார்கள். (இப்னு கஸீர் விளக்கவுரை).

அருள்மறை குர்ஆன் உலக மக்கள் அனைவருக்கும் பொதுவானது என்பதாலும்,

நபி (ஸல்) அவர்கள் சொன்னதாக வரும் செய்திகள் அனைத்தும் பலகீனமாக இருப்பதாலும்,

'தூய்மையானவர்களைத் தவிர' என்பது மனிதர்களை குறிக்கவில்லை என்பதாலும்,

அருள்மறை குர்ஆனை எந்த சந்தர்ப்பத்திலும், எந்நிலையிலும் தொடலாம், ஓதலாம். அதைத் தடுப்பதற்கு எந்த முகாந்திரமும் இல்லை.

ஓசையும் உச்சரிப்புமாக இறங்கிய குர்ஆன் பிற்கால மக்களுக்காக எழுத்து வடிவமாக பதிவு செய்து, பாதுகாக்கப்பட்டு வருகின்றது. எழுத்து வடிவத்தைப் படிக்கும்போது ஓசையும், உச்சரிப்பும் அதேவிதத்தில் வருவதால் எல்லா புத்தகங்களைப் போன்றதுதான் என்று சமமாக பார்க்க முடியாது. குர்ஆனில் இருக்கும் பொருளின் காரணத்தால் - குர்ஆனுக்கு கண்ணியம் அவசியமாகிறது என்பதை விளங்கலாம்.

குர்ஆனை மக்கள் தொடும் விஷயத்தில், ஓதும் விஷயத்தில் ஒளு வேண்டும், தூய்மை வேண்டும் என்று நாமாகப் பல தடைகளைப் விதித்திருப்பதால்தான் மக்கள் குர்ஆனிலிருந்து விலகி நிற்கின்றனர். குர்ஆனிலிருந்து மக்களை விடுபடச் செய்யும் இந்த போக்கு அநீதி என்றே முடிவு செய்ய முடிகிறது.

பெருமானாரின் பத்துக் கட்டளைகள்

அஸ்ஸலாமு அலைக்கும்! வரஹ்மத்துல்லாஹ்.

1417 ஆண்டுகளுக்கு முன் …. ஹிஜ்ரி பத்தாம் ஆண்டு….

பெருமானார்(ஸல்) அவர்கள் அரபாத் பெருவெளியில் உரை நிகழ்த்தினார்கள்:-

அதில் பத்து விசயங்களை தமது அன்புக் கட்டளைகளாக உலகின் முன் வைத்தார்கள்.

1.( மக்களே! ) நன்றாகக் கவனத்துடன் கேட்டுக்கொள்ளுங்கள். ஏனெனில், அடுத்த வருடம் இதே நாளில் இதே இடத்தில் உங்கள் மத்தியில் நான் இருப்பேனாவென்பது எனக்குத் தெரியாது.

இந்த நாளும், இந்த மாதமும், இந்த நகரமும் பரிசுத்தமானவை. அதுபோலவே உங்களது உயிரும், உடைமையும்,கண்ணியமும் பரிசுத்தமானவையாகும். (இறுதிநாள்வரை அவை பரிசுத்தமாக இருக்க வேண்டும். யாரும் அவற்றில் தலையிடவோ, அபகரிக்கவோ கூடாது.)இறைவனின் சமூகத்திலே இவற்றிற்கெல்லாம் நீங்கள் கணக்களிக்க வேண்டியதிருக்கும் என்பதை நினைவில் வைத்துக்கொள்ளுங்கள்.

2.( மக்களே! ) ஒருவர் குற்றம் செய்தால் அக்குற்றத்தின் தண்டனை அவரது குடும்பமத்தினருக்கல்ல.,அவருக்கே வழங்கப்படும். தந்தை தன் பிள்ளைக்கோ,பிள்ளை தன் தந்தைக்கோ அநியாம் செய்யவேண்டாம். தந்தையின் குற்றத்திற்காக பிள்ளையையோ,பிள்ளையின் குற்றத்திற்காகத் தந்தையையோ தண்டிக்கப்படமாட்டாது.

3.( மக்களே! ) அஞ்ஞான காலத்தில் (இஸ்லாத்திற்கு முன்பு ஏற்பட்ட) கொலைகளுக்கும், கொடுஞ்செயல்களுக்கும், பழிவாங்கும் உரிமை இன்று முதல் ரத்து செய்யப்பட்டுவிட்டது. முதலாவது எனது குடும்பத்தைச்சார்ந்த ரபீஆ இப்னுல் ஹாரிதின் கொலைக்கு பழிவாங்குவதை நான் மனப்பூர்வமாக நிறுத்திவிட்டேன்.(அறியாமைக்காலத்தில் நிலவிய பழிக்குப்பழியும் உயிர்போக்கும் மடமையும் இனி கூடாது.)

4.( மக்களே! ) வட்டி வாங்குதல் இனி உங்களுக்குத் தடுக்கப்படுகிறது. அஞ்ஞான காலத்தில் ஏற்பட்ட வட்டித் தொகையனைத்தும் இன்று முதல் ரத்து செய்யப்படுகின்றன. (கடன்பட்டவர்கள் முதலை மட்டும் திருப்பிக் கொடுத்துவிட்டால் போதுமானது.)முதலாவது எனது பெரிய தந்தையார் அப்பாஸ் இப்னு அப்துல் முத்தலிப்

அவர்களுக்கு வரவேண்டிய வட்டித் தொகையனைத்தும் தள்ளுபடி செய்துவிட்டேன்...

5.மக்களே! பெண்கள் குறித்து அல்லாஹ்வை அஞ்சிக் கொகொள்ளுங்கள். உங்கள் மனைவியர் மீது உங்களுக்கு உரிமை உள்;ளது போல், உங்கள் மீதும் உங்கள் மனைவியர் மீது உரிமையுண்டு). அவர்கள் உங்கள் கைகளிலே ஒப்படைக்கப்பட்ட (அமானிதம்) அடைக்கலப் பொருள்களாவர். அல்லாஹ்வின் பெயரால் அவர்களை உங்கள் மனைவியராகப் பொறுப்பேற்றிருக்கிறீர்கள். அவர்களின் கடமை, நீங்கள் விரும்பாதவர்களை உங்கள் இல்லத்திற்குள் அனுமதிக்கலாகாது. மீறினால் படுக்கையை விட்டு சிறிது காலம் விலக்கிவைக்கவோ,காயம் ஏற்படாதவாறு அடிக்கவோ செய்யுங்;கள். (அதுபோல) உங்களது கடமை நீங்கள் அவர்களுக்கு வேண்டிய உணவு,உடைகளை வழங்கி (அன்புடனும் கருணையுடனும் நடந்து கொள்ளுங்கள். இறைவனுக்குப் பயந்து அவர்களது) நன்மைகளைப் பேணி வாருங்கள்.

6.மக்களே! எனது வார்த்தைகளை கவனத்துடன் கேளுங்கள், கேட்டு நன்றாகப் புரிந்து கொள்ளுங்கள். எல்லா முஸ்லிம்களும் ஒருவருக்கொருவர் சகோதரரே என்பதைத் தெரிந்து கொள்ளுங்கள். ஒரே சகோதரத்துவத்தைச் சேர்ந்தவர்கள் நீங்கள! ஒருவருடைய பொருளை அவர் மனப்பூர்வமாகக் கொடுத்தாலன்றி, மற்றவர் எடுப்பது (ஹராம்) தடுக்கப்படுகிறது. அநியாயம் செய்வதிலிருந்து கவனத்துடன் விலகிக் கொள்ளுங்கள். உங்களிடம் இரு பெரும் பொக்கிஷங்களை வி;டுச்செல்கிறேன்... அவைகளை பின்பற்றும் வரையில் வழி தவறமாட்டீர்கள்.

முதலாவது எனது திருவேதமான திருக்குர்ஆன!

இரண்டாவது இறைவனது தூதரான எனது வாழ்கை நெறிகள் (ஸுன்னத்)!

7.மக்களே! எனக்குப்பிறகு எந்த ஒரு இறைதூதரும் (நபியும்) இல்லை. உங்களுக்குப்பின் எந்த ஒரு சமுதாயமும் வரப்போவதில்லை. தெரிந்து கொள்ளுங்கள்! உங்களைப்படைத்துக் காக்கும் உங்கள் இறைவனையே வணங்குங்கள். உங்களுக்குக் கடமையாக்கப்பட்ட ஐவேளைத் தொழுகைகளை சரிவர நிறைவேற்றி வாருங்கள்.

ரமளான் (என்னும் புனித) மாதத்தில் நோன்பு நோற்று வாருங்கள். உங்கள் செல்வத்துக்குரிய ஸகாத்தை (கணக்கிட்டு) உங்ளைப் பரிசுத்தப் படுத்துவதற்காக வழங்கி வாருங்கள். உங்கள் இறைவனின் இல்லத்திற்குச் சென்று ஹஜ்ஜுக் கடமையையை நிறைவேற்றி வாருங்கள். உங்களை ஆளும் தலைவர்களுக்குக் கட்டுப்படுங்கள். இவற்றால் நீங்கள் உங்களுக்காகச் சித்தப்படுத்தப்பட்டுள்ள சுவனத்திற:குச் செல்வீர்கள்.

8.மக்களே! உங்கள் இறைவனை மிக விரைவில் நீங்கள் சந்திப்பீர்கள். அவன் உங்கள் செயல்கள் அனைத்தையும் பற்றி விசாரணை செய்வான். எனக்குப்பிறகு நீங்கள் உங்ளுக்கிடையே கொலைக் குற்றம் புரிந்து வழிகேடர்களாக மாறிவிடவேண்டாம். அறிந்து கொள்ளுங்கள்! நிச்சயமாக சைத்தான் உங்களின் இந்த பூமியில் அவனை வணங்குவதைக் குறித்து (ஏமாற்றமடைந்து) முற்றிலும் நிராசையடைந்து விட்டான். ஆயினும் நீங்கள் மிக இலேசாகக் கருதும் செயல்களில் அல்லாஹ்வுக்கு மாறு செய்யவைத்து சைத்தானுக்கு (உடன்பட்டு) தலைவணங்குவீர்கள். அதன் மூலம் அவன் மகிழ்சியடைவான். ( எந்தவகையிலும் சைத்தானியச் செயல்களுக்கு இசைந்துவிடாதீhகள்)

9.மக்களே! அறிந்து கொள்ளுங்கள!. உங்கள் இறைவன் ஒருவனே! உங்கள் தந்தையும் ஒருவரே!

இறையச்சம் கொண்டோரைத்தவிர, 'அரபிகள் அஜமி (அரபியல்லாதார்)களை விட உயர்ந்தோருமல்ல. அதுபோல் அஜமிகள் அரபிகளைவிட உயர்ந்தோருமல்ல. வெள்ளை நிறத்தவர் கறுப்பு நிறத்தவரை விடவோ, கறுப்பு நிறத்தவர் வெள்ளை நிறத்தை விடவோ சிறந்தோருமல்ல. அனைவரும் ஆதமுடைய மக்களே! அந்த ஆதம் மண்ணால் படைக்கப்பட்டவரே. (ஜாதித்திமிர், நிறத்திமிர்,குலத்திமிர் அனைத்தையும் இதோ எனது காலின் போட்டு மிதிக்கிறேன்.) சொற்பொழிவை முடித்த வள்ளல் பெருமானார்(ஸல்) வெள்ளம்போல் திரண்டிருந்த கூட்டத்தினரை நோக்கிக் கேட்டனர்.

10.( மக்களே! ) இறைவனது கட்டளைகளை நான் உங்களுக்கு அறிவித்து விட்டேனா? இறைவன் எனக்களித்த தூதை நிறை வேற்றிவிட்டேனா? என என்னைப்பற்றி உங்களிடம் விசாரிக்கும் போது), இறுதித் தீர்ப்பு நாளில் என்ன பதில் கூறுவீர்கள்?

'நிச்சயமாக (இறைவனது கட்டளைகளை) எங்களுக்கு) அறிவித்துவிட்டீர்கள்! இறைவன் தங்களுக்கு வழங்கிய தூதுவத்தை (நபித்துவத்தை) முழுமையாக நிறைவேற்றிவிட்டீர்கள்! எங்கள் வாழ்வுக்குத் தேவையான அனைத்து அறிவுரைகளையும் வழங்கிவிட்டீர்கள். என்றும் சாட்சியம் கூறுவோம்.!'

அந்த மாபெரும் மனிதக்கடலிலிருந்து ஒருமுகமாக வான்முட்ட எழுந்தது இந்தப் பேரொலி.

இதைக்கேட்ட இறுதித்தூதர் (ஸல்) அவர்கள் வானத்தை நோக்கி தங்களது திருக்கரங்களை உயர்த்தி,' அல்லாஹும்மஷ்ஹது! அல்லாஹும்மஷ்ஹது!! அல்லாஹும்மஷ்ஹது!!!

இறைவா!நீயேஇதற்கு சாட்சி! இறiவா!நீயே இதற்கு சாட்சி!

இறைவா! நீயே இதற்கு சாட்சி! என்று மும்முறை முழங்கினார்கள்.

மேலும் இங்கு வந்திருப்பவர்கள், வராதவர்களுக்கும் என்னுடைய இந்தச் செய்திகளைத் தெரிவித்துவிடுங்கள்... ஏனெனில் நேரில் கேட்போரைவிட கேள்விப்படுவோரில் சிலர் நன்கு விளக்கமுடையோராக இருப்பர்.

(ஆதார நூற்கள்: புகாரி,முஸ்லிம்,அபூதாவூது,திர்மிதி,முஸ்னது அஹ்மது, இப்னு ஜரீர்,இப்னுஹிஷhம்,ரஹமத்துன் லில் ஆலமீன், முஹம்மது ரஸூலுல்லாஹ்.

நல்லறம் செய்யும் யூத, கிறித்தவர்களுக்குக் கவலை இல்லை ??? - திருக்குர்ஆன் 2:62

திருக்குர்ஆன் 2:62 வசனத்தில் நல்லறம் செய்யும் யூத, கிறித்தவர்களுக்குக் கவலை இல்லை என்று கூறப்படுகின்றது. இந்த அடிப்படையில் யூத, கிறித்தவர்களை காஃபிர்கள் என்று கூறுவது சரியா?

நம்பிக்கை கொண்டோர், யூதர்கள், கிறித்தவர்கள், மற்றும் ஸாபியீன்களில் அல்லாஹ்வையும், இறுதி நாளையும் நம்பி, நல்லறம் செய்வோருக்கு அவர்களின் கூலி அவர்களின் இறைவனிடம் உண்டு. அவர்களுக்கு எந்தப் பயமும் இல்லை. கவலைப்படவும் மாட்டார்கள். (அல்குர்ஆன் 9:60)

இந்த வசனத்தில், நல்லறம் செய்யும் எல்லா யூத, கிறித்தவர்களுக்கும் கவலை இல்லை என்று கூறப்படவில்லை. யூத, கிறித்தவர்களில் அல்லாஹ்வையும், மறுமை நாளையும் நம்பி, அதாவது ஈமான் கொண்டு நல்லறம் செய்பவர்களுக்கு எந்தக் கவலையும் இல்லை என்று தான் இந்த வசனம் கூறுகின்றது.

யூதர்களும் கிறித்தவர்களும் தமக்கு அருளப்பட்ட வேதத்தை நம்பினால் மறுமையில் அவர்கள் வெற்றி பெறுவார்கள் என்பது உண்மை தான்.

அவர்களின் வேதங்களில் இறுதித் தூதர் முஹம்மத் (ஸல்) அவர்களின் வருகை பற்றியும், அவர் வரும் போது அவரைப் பின்பற்றுவது பற்றியும் கட்டளையிடப்பட்டுள்ளது. அந்தக் கட்டளையை அவர்கள் மீறினால் அவர்கள் தமது வேதத்தையே நம்பவில்லை என்பது தான் பொருள்.

நாம் யாருக்கு வேதத்தை வழங்கினோமோ அவர்கள், தமது பிள்ளைகளை அறிவது போல் இவரை அறிவார்கள். அவர்களில் ஒரு சாரார் அறிந்து கொண்டே உண்மையை மறைக்கின்றனர்.

அல்குர்ஆன் 2:146

இதே கருத்து 3:71, 6:20, 7:157, 23:69 ஆகிய வசனங்களிலும் கூறப்பட்டுள்ளது.

நபிகள் நாயகம் வருவதற்கு முன் யூதர்களும் கிறித்தவர்களும் தமது வேதங்களின் அடிப்படையில் நடந்து மரணித்திருந்தால் அவர்கள் அஞ்சத் தேவையில்லை.

நபிகள் நாயகம் வந்த பின் அவர்களை ஏற்றுக் கொண்டால் தான் அவர்கள் தமது வேதங்களை நம்பினார்கள் என்று சொல்ல முடியும்.

ஈமான் கொள்ளாத யூத, கிறித்தவர்களை காஃபிர்கள் என்று அழைப்பதில் தவறில்லை. இதைக் கீழ்க்கண்ட வசனத்திலிருந்தும் அறியலாம்.

இவ்வாறே உமக்கு இவ்வேதத்தை அருளினோம். நாம் யாருக்கு வேதத்தை வழங்கினோமோ அவர்கள் இதை நம்புகின்றனர். (வேதம் கொடுக்கப்படாத) இவர்களிலும் இதை நம்புவோர் உள்ளனர். (நம்மை) மறுப்போரைத் தவிர வேறு எவரும் நமது வசனங்களை நிராகரிப்பதில்லை.

அல்குர்ஆன் 29:47

முஹம்மத் (ஸல்) அவர்களை அல்லாஹ்வின் தூதர் என்று நம்பாத, அவர்களுக்கு வழங்கப்பட்ட திருக்குர்ஆனை இறை வேதம் என்று நம்பாத அனைவருமே இஸ்லாத்தின் பார்வையில் காஃபிர்கள் , இறை மறுப்பாளர்கள் தான். காஃபிர்களைத் தவிர வேறு யாரும் நமது வசனங்களை மறுப்பதில்லை என்று இறைவன் கூறுவதிலிருந்து இதை அறிய முடியும்.

அல்லாஹ்வின் அத்தாட்சிகள்

அவர்களில் அழகிய நல்லறம் செய்பவர் யார் எனச் சோதிப்பதற்காக இந்தப் பூமியின் மேல் உள்ளவைகளை அதற்கு அலங்காரமாக நிச்சயமாக நாம் ஆக்கியுள்ளோம். மேலும் அதன் மேல் உள்ளதை வறண்ட மண்ணாகவும் நாம் ஆக்கக் கூடியவர்களே!'. (அல்குர்ஆன் 18:07,08)

இவ்விரு வசனங்களில் இரண்டு செய்திகள் அடங்கியுள்ளன.

இறைவன் எத்தகைய ஆற்றல் மிக்கவன் என்பது ஒரு செய்தி!

மனிதர்களுக்கு இவ்வுலகில் இன்பங்களை வாரி வழங்கியிருப்பது ஏன் என்பது மற்றொரு செய்தியாகும்.

இவ்வசனத்தில் தனது வல்லமையைக் கூற வெகு தொலைவுக்கு மனிதனை இழுத்துச் செல்லாமல் அவன் எந்த மண்ணில் வாழ்கின்றானோ அந்த மண்ணையே இதற்குக் களமாக்கிக் காட்டுகின்றான்.

எவ்வித கவர்ச்சியும் அலங்காரமும் இல்லாமல் கட்டாந்தரையாகக் கிடந்த பூமியின் மேல் மழையை விழச்செய்து அவற்றில் மரம் செடி கொடிகளை முளைக்கச் செய்கிறான். இவ்வாறு முளைத்தவுடன் பூமிக்கு புதுப் பெண்ணின் கவர்ச்சி வந்து விடுகின்றது. இதை நாம் தான் செய்கின்றோம் என்று இங்கே சுட்டிக் காட்டுகின்றான்.

திருக்குர்ஆனின் வேறு இடங்களில் இன்னும் அழுத்தமாகத் தனது இந்த ஆற்றலை மனிதனுக்குச் சுட்டிக் காட்டியிருக்கின்றான்.

'அவனே வானத்திலிருந்து மழையை இறக்கினான். அதைக் கொண்டு எல்லா வகையான புற்பூண்டுகளையும் நாம் வெளிப்படுத்துகின்றோம். அதிலிருந்து நாம் வித்துக்களை அடர்த்தியான கதிர்களாக வெளிப்படுத்துகின்றோம். பேரிச்சை மரத்தின் பாளையிலிருந்து வளைந்து தொங்கும் பழக்குலைகளும் இருக்கின்றன. திராட்சைத் தோட்டங்களையும் (பார்வைக்கு) ஒன்று போலவும் (சுவைக்கு) வௌ;வேறாகவும் உள்ள மாதுளை, ஜைத்தூன் ஆகியவற்றையும் (நாம் வெளிப்படுத்தியிருக்கின்றோம்) அவை (பூத்துக்) காய்ப்பதையும் பின்னர் கனிந்து பழமாவதையும் நீங்கள் உற்று நோக்குவீர்களாக - ஈமான் கொள்ளும் மக்களுக்கு நிச்சயமாக இவற்றில் அத்தாட்சிகள் அமைந்துள்ளன'. (திருக்குர்ஆன் 6:99)

'பந்தல்களில் படர விடப்பட்ட கொடிகளும் படர விடப்படாச் செடிகளும் பேரீச்சை மரங்களும் உள்ள சோலைகளையும் புசிக்கத் தக்க விதவிதமான காய், கறி தானியங்களையும் ஒன்று போலவும் வௌ;வேறாகவும் தோற்றமளிக்கும் ஜைத்தூன் (ஒலிவம்) மாதுளை ஆகியவற்றையும் அவனே படைத்தான். ஆகவே அவை பலனளித்தால் அவற்றின் பலனிலிருந்து புசியுங்கள். அவற்றை அறுவடை செய்யும் காலத்தில் அதற்குரிய (கடமையான) பாகத்தைக் கொடுத்து விடுங்கள். வீண்விரயம் செய்யாதீர்கள். நிச்சயமாக அவன் (அல்லாஹ்) வீண் விரயம் செய்பவர்களை நேசிப்பதில்லை'. (அல்குர்ஆன் 6:141)

'இன்னும் பூமியில் அருகருகே இணைந்தாற்போல் பல பகுதிகளை (அமைத்து அவற்றில்) திராட்சைத் தோட்டங்களையும் விளைநிலங்களையும் கிளைகள் உள்ளதும் கிளைகள் இல்லாததுமான பேரீச்சை (வர்க்கத்தை)யும் (அவனே உண்டாக்கினான், இவையனைத்திற்கும்) ஒரே தண்ணீர் கொண்டு தான் பாய்ச்சப் பட்டாலும் அவற்றில் சிலவற்றை வேறு சிலவற்றை விட சுவையில் நாம் மேன்மையாக்கி இருக்கிறோம். நிச்சயமாக இவற்றில் உணர்ந்தறியும் மக்களுக்குப் பல அத்தாட்சிகள் இருக்கின்றன'. (அல்குர்ஆன் 13:04)

'அதனைக் கொண்டே (விவசாயப்) பயிர்களையும் ஒலிவ (ஜைத்தூன்) மரத்தையும் பேரீச்சை மரங்களையும் திராட்சைக் கொடிகளையும் இன்னும் எல்லா வகைக் கனி வர்க்கங்களிலிருந்தும் அவன் உங்களுக்காக விளைவிக்கிறான். நிச்சயமாக இதில் சிந்திக்கும் மக்கள் கூட்டத்தாருக்கு (தக்க) அத்தாட்சி இருக்கிறது'. (அல்குர்ஆன் 16:11)

'இன்னும் தூர் ஸினாய் மலைக்கருகே உற்பத்தியாகும் மரத்தையும் (உங்களுக்காக நாம் உண்டாக்கினோம்) அது எண்ணையை உற்பத்தி செய்கிறது. மேலும் (ரொட்டி போன்றவற்றை) சாப்பிடுவோருக்கு தொட்டு சாப்பிடும் பொருளாகவும் (அது அமைந்துள்ளது)'. (அல்குர்ஆன் 23:20)

'அவர்கள் பூமியைப் பார்க்கவில்லையா? அதில் மதிப்பு மிக்க எத்தனையோ வகை (மரம், செடி, கொடி) யாவற்றையும் ஜோடி ஜோடியாக நாம் முளைப்பித்திருக்கின்றோம்'. (அல்குர்ஆன் 26:07)

'அன்றியும் வானங்களையும் பூமியையும் படைத்து உங்களுக்கு வானத்திலிருந்து மழையை இறக்கி வைப்பவன் யார்? பின்னர் அதைக் கொண்டு செழிப்பான தோட்டங்களை நாம் முளைக்கச் செய்கின்றோம். அதன் மரங்களை முளைக்கச் செய்வது உங்களால் முடியாது. (அவ்வாறிருக்க) அல்லாஹ்வுடன் (வேறு) நாயன் இருக்கின்றானா? இல்லை! ஆயினும் அவர்கள் (தம் கற்பனை தெய்வங்களை அல்லாஹ்வுக்கு) சமமாக்கும் மக்களாகவே இருக்கிறார்கள்'. (அல்குர்ஆன் 27:60)

'அவர்கள் (இதையும்) கவனிக்கவில்லையா? - நிச்சயமாக நாமே வறண்ட பூமியின் பக்கம் மேகங்கள் மூலமாக தண்ணீரை ஓட்டிச் சென்று அதன் மூலம் இவர்களும் இவர்களுடைய கால்நடைகளும் உண்ணக் கூடிய பயிர்களை வெளிப்படுத்துகிறோம். அவர்கள் (இதை ஆய்ந்து) நோட்டமிட வேண்டாமா?'. (அல்குர்ஆன் 32:27)

'பூமி முளைப்பிக்கின்ற (புற் பூண்டுகள்) எல்லாவற்றையும் (மனிதர்களாகிய) இவர்களையும் இவர்கள் அறியாதவற்றையும் ஜோடி ஜோடியாகப் படைத்தானே அவன் மிகவும் தூய்மையானவன்'. (அல்குர்ஆன் 36:36)

'நீர் பார்க்கவில்லையா? அல்லாஹ் வானத்திலிருந்து நீரை இறக்கி, அதனை பூமியில் ஊற்றுக்களில் ஓடச் செய்கிறான். அதன் பின் அதைக் கொண்டு வௌ;வேறு நிறங்களை உடைய பயிர்களை வெளிப்படுத்துகிறான். அப்பால் அது உலர்ந்து மஞ்சள் நிறமடைகிறதை நீர் பார்க்கிறீர். பின்னர் அதைக் கூளமாகச் செய்து விடுகின்றான். நிச்சயமாக இதில் அறிவுடையோருக்குப் படிப்பினை இருக்கிறது'. (அல்குர்ஆன் 39:21)

'(பூமியில்) விதைப்பதை நீங்கள் கவனித்தீர்களா? அதனை நீங்கள் முளைக்கச் செய்கிறீர்களா? அல்லது நாம் முளைக்கச் செய்கிறோமா?'. (அல்குர்ஆன் 56:63,64)

கடவுள் என்று ஒருவன் இருக்கின்றான் என்பதற்கும் அவனது வல்லமைக்கும் மண்ணில் முளைக்கும் பயிர் பச்சைகள் மிகப் பெரும் சான்றாகவுள்ளதால் தான் இதை முக்கியத்துவத்துடன் அல்லாஹ் சுட்டிக் காட்டுகின்றான்.

இனிப்பான மாம்பழத்தை மாமரம் உற்பத்தி செய்கிறது என்றால் மாங்கொட்டையில் அந்த இனிப்பு இருக்கவில்லை. அது புதைக்கப்பட்ட மண்ணிலும் அந்த இனிப்பு இருக்க வில்லை. ஊற்றுகின்ற தண்ணீரிலோ வீசுகின்ற காற்றிலோ வெளிச்சத்திலோ இனிப்பு இருந்ததில்லை. ஆனாலும் மாம்பழங்கள் இனிக்கின்றன.

இப்படிப் பல்வேறு சுவைகள் கொண்ட கனிகளை மனிதன் உண்ணும் போது அதைப் பற்றி சிந்தித்தால் 'சூப்பர் பவர்' உள்ள ஒருவன் ஆட்டிப் படைக்கின்றான் என்பதைச் சந்தேகமற அறிந்து கொள்வான்.

இலைகள், பூக்கள், காய்கள், கனிகளில் தான் எத்தனை வண்ணங்கள்! அந்த வண்ணங்கள் எப்படி வந்தன? என்றெல்லாம் ஆராயும் ஒருவன் கடவுளை மறுக்கவே மாட்டான்.

அடிக்கடி பார்த்துப் பழகியதால் நாம் இதை உரிய விதத்தில் சிந்திப்பதில்லை. மண்ணில் முளைத்தெழும் ஒவ்வொன்றிலும் கணக்கிட முடியாத அதிசயங்கள் புதைந்து கிடப்பதை இதனால் தான் நாம் சிந்திப்பதில்லை. எப்போதும் தூரத்தில் இருப்பது தான் நமக்கு அதிசயமாகத் தோன்றும். நம் பக்கத்தில் நிற்கும் அதிசயங்கள் அதிசயங்களாகத் தோன்றாது.

மனிதன் இதைச் சிந்திக்க மாட்டான் என்பதற்காகத் தான் இம்மண்ணின் மேல் உள்ளவற்றை மண்ணுக்கு அலங்காரமாக ஆக்கினோம் என்று அல்லாஹ் கூறுகின்றான்.

இதை மட்டும் கூறிவிட்டு நிறுத்திக் கொண்டால் கூட இதெல்லாம் இயற்கை என்று மனிதன் கூறி விடுவான்.

நாளை வறண்ட பாலைவனமாகவும் நாம் ஆக்குவோம் என்று சேர்த்துக் குறிப்பிடுகின்றான்.

உரிய நேரத்தில் உரிய அளவில் மழை பெய்த பிறகு இயற்கையாக முளைத்தன என்று கூறும் மனிதனே! உரிய நேரத்தில் மழை பெய்ததும் இயற்கையா? உரிய அளவில் மழை பெய்ததும் இயற்கையா? மேலப்பாளையத்தில் பெய்து விட்டு பாளையங்கோட்டையில் பெய்யாமல் இருந்ததும் இயற்கையா?

காற்றும் குளிர்ந்து தரையும் குளிர்ந்து இதோ மழை வரப் போகின்றது என்று நினைத்துக் கொண்டிருக்கும் போது ராஜஸ்தான் பாலைவனத்தில் - அனலாய் கொதிக்கும் பூமியில் - மழையை விரட்டிச் சென்று பெய்விப்பவன் யார்?

இதற்கு இயற்கை என்று எவனும் காரணம் சொல்ல முடியாது அல்லவா? இதனால் தான் தனது வல்லமைக்கு பசுமையை மட்டும் சான்றாகக் கூறி நிறுத்திக் கொள்ளாமல் வறட்சியை ஏற்படுத்துவதும் நாம் தான் எனக் கூறி ஆப்பு வைக்கிறான்.

இந்த இடத்தில் ஏன் இத்தனை வருடங்களாக மழை பெய்யவில்லை என்ற கேள்விக்கு 'இயற்கை' என்று விடை கூற முடியாது. யாரோ ஒருவன் தான் இதற்குக் காரணமாக இருக்கின்றான் என்பது தான் இதற்கு விடையாக இருக்க முடியும்.

இறைவனை மனிதன் நம்ப வேண்டும், அதுவும் சிந்தித்து விளங்கி நம்ப வேண்டும் என்ற காரணத்தினால் தான் இந்த சின்னஞ்சிறு சொற்றொடருக்குள் சேர்த்துக் கூறிவிடுகின்றான்

இஸ்லாத்தில் பொதுவாக தடுக்கப்பட்டவைகள்

• அநியாயமாக ஓர் உயிரைக் கொல்வது.
• சிசுக்களைக் கொல்வது.
• தற்கொலை செய்வது.
• விபசாரம் செய்வது.
• ஓரின சேர்க்கை புரிவது.
• சுய இன்பம் அடைவது.
• மது அருந்துவது, அதை தயார் செய்வது, அதை விற்பது, எடுத்துச் செல்வது.
• திருடுவது.
• பெற்றோருக்கு மாறு செய்வது, அவர்களை அதட்டுவது, மிரட்டுவது, சீ என்று அவர்களை சொல்வது.
• போரில் புறமுதுகுக் காட்டி ஓடுவது.
• முஃமின்களுக்கு நோவினை செய்வது, அவர்கள் செய்யாத குற்றத்தை அவர்கள் மீது சுமத்துவது, அவர்களைக் குறை கூறுவது.
• அல்லாஹ்வுக்கு அதிருப்தியளித்து மக்களை மகிழ்விப்பது.
• ஒப்பந்தங்களை உறுதி செய்தபின் அவைகளை முறிப்பது.
• பெற்றோரை மாற்றிக் கூறுவது.
• நெருப்பால் தண்டிப்பது, உயிர் உள்ள வைகளை, இறந்தவைகளை நெருப்பிட்டுக் கொளுத்துவது.
• இறந்தவர்களின் உடல் உறுப்புகளை வெட்டுவது, சிதைப்பது.
• பாவமான, தவறான, அநியாயமான காரியங்களில் பிறருக்கு உதவுவது.
• முஸ்லிம்களுக்கு எதிராக ஆயுதம் ஏந்துவது.
• முஸ்லிம்களுக்கு கெடுதல் விளைவிப்பது, அதற்கு சூழ்ச்சி செய்வது.
• மார்க்கக் கல்வி ஞானமின்றி தீர்ப்பளிப்பது.
• அல்லாஹ்வுக்கு பிடிக்காதவற்றில் பிறருக்கு கீழ்படிவது. (அவர் யாராக இருப்பினும் சரியே!)
• பொய் சத்தியம் செய்வது.
• வீணாக சத்தியம் செய்வது.
• ஒழுக்கமான பெண்களை பழி சுமத்தியவர்கள் தவ்பா செய்து திருந்தவில்லையெனில் அவர்களது சாட்சியை ஏற்றுக் கொள்வது.
• அல்லாஹ் அனுமதித்தவைகளை ஹராம் என்று விலக்கிக் கொள்வது.
• ஷைத்தானின் வழிகளை பின்பற்றுவது.
• அனுமதியின்றி பிறர் பேசிக் கொண்டிருப்பதை கேட்பது.
• அனுமதியின்றி பிறர் வீட்டில் நுழைவது.
• தனக்கு சொந்தமல்லாததை தனக்கு சொந்தமானது என்று கூறுவது
• தான் அனுபவிக்காததை அனுபவித்த தாகக் கூறுவது, தன்னிடம் இல்லாததை இருப்பதாகக் கூறுவது.
• செய்யாத ஒன்றைக் கூறி புகழ் தேடுவது.
• இறை கோபத்திற்கும் தண்டனைக்கும் ஆளானவர்களின் ஊர்களுக்குள் செல்வது. (ஆனால் படிப்பினை பெரும் நோக்கத்துடன் அல்லது அழுதவர்களாக அவ்வூர்களுக்குச் செல்வது கூடும்.)
• பாவமான விஷயத்தில் அல்லாஹ்வின் மீது சத்தியம் செய்வது.
• பிறர் குறைகளை ஆராய்வது.
• நல்ல ஆண், பெண்கள் மீது கெட்ட எண்ணம் கொள்வது.
• பொறாமை கொள்வது.
• குரோதம் கொள்வது.
• உறவுகளை, சமுதாயத்தை புறக்கணித்து வாழ்வது.
• அசத்திய வழியில் செல்வது.
• பெருமை, பகட்டு, தற்பெருமை, அகந்தை, அகம்பாவம், மமதை கொள்வது.
• உலக வஸ்துக்களைக் கொண்டு மகிழ்ச்சி அடைவது.
• பூமியில் பெருமையாக நடந்து செல்வது.
• மக்களை விட்டும் முகத்தை திருப்பிக் கொள்வது. (அதாவது மக்களிடம் பழகுவதை தவிர்ப்பது பெருமையின் அடையாளமாகும்.)
• கொடுத்த தர்மத்தை திரும்பப் பெருவது. (தர்மம் கொடுத்த பொருளை விலைக்குக் கூட திரும்ப வாங்கக் கூடாது.)
• தந்தை தனது மகனைக் கொலை செய்துவிட்டால் அவரைக் கொல்வது.
• பிறரின் மர்மஸ்தானத்தைப் பார்ப்பது. (இந்த சட்டத்தில் ஆண், பெண் இருபாலாரும் சமமானவர்களே.)
• பிறரின் தொடையை பார்ப்பது. (அவர் இறந்தவராயினும் சரியே!)
• சங்கைமிகு (ரஜப், துல் கஅதா, துல்ஹஜ், முஹர்ரம் ஆகிய) மாதங்களின் கண்ணியத்தை பாழ்படுத்துவது.
• கெட்ட வழியில் சம்பாதித்து நல்ல வழியில் செலவு செய்வது.
• தொழிலாளியிடம் வேலை வாங்கிக் கொண்டு கூலி கொடுக்காமல் இருப்பது.
• பிள்ளைகளுக்கு சமத்துவமின்றி அன்பளிப்பு வழங்குவது.
• வஸிய்யத் செய்வதில் தவறிழைப்பது.
• வாரிசுக்கு வஸீய்யத் செய்வது.
• முழு சொத்தை வஸீய்யத் செய்வது. (அப்படி வஸிய்யத் செய்தாலும் மூன்றில் ஒன்றுதான் செல்லுபடியாகும்.)
• அண்டை வீட்டாருடன் தவறாக நடந்து கொள்வது.
• அண்டை வீட்டாருக்கு நோவினை செய்வது, தொந்தரவு தருவது.
• மார்க்கக் காரணமின்றி மூன்று நாள்களுக்கு மேல் ஒரு முஸ்லிமுடன் பேசாமல் இருப்பது.
• கற்களை சுண்டி எறிந்து விளையாடுவது. (இதன் மூலம் பிறருக்கு தீங்கு ஏற்படலாம். மேலும் கண், பற்களில் பட்டு காயம் ஏற்படலாம்.)
• பிறர் மீது அத்துமீறுவது. (ஏசுவது, சண்டையிடுவது, உரிமையைப் பறிப்பது.)
• போட்டிக்காக ஒருவர் மற்றவரைவிட சப்தமிட்டுக் குர்ஆன் ஓதுவது.
• இருவர் பேசிக் கொண்டிருக்கும்போது அனுமதியின்றி குறுக்கிடுவது. அனுமதியின்றி அவர்களைப் பிரிந்து செல்வது.
• ஒருவர் அமர்ந்திருக்கும்போது அவரை எழுப்பிவிட்டு அந்த இடத்தில் அமர்வது.
• ஒருவருடன் இருக்கும்போது அவர் அனுமதியின்றி எழுந்துச் செல்வது.
• அமர்ந்திருப்பவருடைய தலைக்குப் பின்னால் நிற்பது.
• பாதி வெயிலிலும் பாதி நிழலிலும் உட்காருவது. (ஏனெனில் இது ஷைத்தானின் முறையாகும்.)
• மக்களுக்கு துன்பம் விளைவிப்பது.
• மக்கள் மீது வாளை ஒங்குவது.
• இரும்புப் பொருள்களைக் கொண்டு ஒருவரை சுட்டிக் காட்டுவது.
• வாள், கத்தி போன்றவைகளை உறுவிய நிலையில் எடுத்துச் செல்வது.
• மார்க்கத்தில் தடையில்லாமல் இருக்கும் போது அன்பளிப்பைத் தவிர்ப்பது.
• தேவையான இடங்களில் தேவைக்கு அதிகமாக செலவு செய்வது.
• தேவையில்லாத இடங்களில் செலவு செய்வது.
• விருந்தாளிக்காக சிரமமெடுத்து பகட்டாக விருந்து செய்வது.
• புத்தி சுவாதீனமானவர்களிடம் அவர்களது பொருளை ஒப்படைப்பது.
• ஆண், பெண்களில் அல்லாஹ் சிலருக்கு கொடுத்திருக்கும் சிறப்பைப் பார்த்து மற்றவர்கள் ஆசைப்படுவது.
• தர்கித்துக் கொள்வது, சண்டையிட்டுக் கொள்வது, வீண் விவாதங்கள் செய்வது.
• விபசாரிகளை தண்டிக்கும்போது கருணை காட்டுவது.
• தர்மம் செய்தபின் அதை சொல்லிக் காண்பிப்பது.
• தர்மம் வாங்கியவரை துன்புறுத்துவது.
• தெரிந்த சாட்சியத்தை மறைப்பது.
• அநாதைகளை அடக்குவது.
• யாசிப்பவர்களை விரட்டுவது.
• அசுத்தமானது, ஹராமானது ஆகியவைகளை மருந்துக்கு உபயோகிப்பது. (அல்லாஹ் இந்த சமுதாயத்திற்கு அசுத்தமான, ஹராமான பொருளில் நோய் நிவாரணத்தை வைக்க வில்லை)
• போரில் பெண்களை, குழந்தைகளை கொல்வது.
• தேவையற்ற சிரமம் எடுப்பது.
• ஒரு மார்க்க அறிஞரிடம் அவரை குழப்பத்திலும் சந்தேகத்திலும் ஆழ்த்தும் விஷயங்களை கேட்பது. அல்லது தனது நுண்ணறிவையும் திறமையையும் வெளிப் படுத்துவதற்காக நடக்காத கற்பனையான விஷயங்களைப் பற்றி கேட்பது.
• எவ்வித பயனுமற்ற வீண் விவாதங்களில் ஈடுபடுவது.
• செஸ், தாயம் மற்றும் இதுபோன்ற விளையாட்டுகள் பணத்திற்காக விளையாடுவது.
• கால்நடைகளை சபிப்பது.
• சோதனை காலத்தில் முகத்தில் அறைந்து கொள்வது, கீறிக் கொள்வது.
• குடிமக்களுக்கு மோசடி செய்வது.
• உலக விஷயத்தில் தன்னை விட தாழ்ந்த நிலையில் உள்ளவரைப் பார்க்காமல் உயர்ந்த நிலையில் உள்ளவரைப் பார்ப்பது. (இது அல்லாஹ் தனக்கு கொடுத்த அருளை உயர்வாகக் கருதாமல் தாழ்வாக கருதுவதற்கு வழி வகுக்கும்.)
• பெருமை பேசுவது.
• வாக்குக்கு மாறு செய்வது.
• அமானிதத்திற்கு மோசடி செய்வது.
• கற்ற கல்வியை மறைப்பது.
• தவறான விஷயத்தில் பரிந்துரை செய்வது.
• தேவையின்றி பிறரிடம் யாசகம் கேட்பது.
• பிரயாணத்தின் போது மணி ஓசை எழுப்புவது. (அதாவது வாகனத்தில் மணி கட்டுவது.)
• நாய்களை வீட்டினுள் வளர்ப்பது. (கால்நடைகள், விவசாயம், தோட்டங்கள் முதலியவற்றின் பாதுகாப்பிற்காக அல்லது வேட்டைக்காக வளர்க்கலாம்.)
• ஒழுக்கம் கற்பிக்க கண்டிக்கும்போது அதிகபட்சம் பத்து அடிக்குமேல் அடிப்பது.
• அதிகமாக சிரிப்பது.
• நோயாளிகளை உண்பதற்கும், பருகு வதற்கும் நிர்பந்திப்பது. (ஏனெனில் அல்லாஹ் அவர்களுக்கு உணவளிக்கிறான், நீர் புகட்டுகிறான்.)
• குஷ்டரோகிகளை உற்றுப் பார்ப்பது.
• ஒரு முஸ்லிம் மற்ற முஸ்லிமை பயமுறுத்துவது.
• தான் கொடுத்த அன்பளிப்புகளையோ, வெகுமதிகளையோ திரும்பப் பெறுவது. (ஆனால் தந்தை பிள்ளைக்குக் கொடுத்த வைகளை திரும்பப் பெறலாம்.)
• இடது கையால் கொடுப்பது, வாங்குவது.
• நிபந்தனையிட்டு நேர்ச்சை செய்வது. (இதனால் அல்லாஹ்வின் விதியை மாற்ற முடியாது. இவ்வாறு கஞ்சன்தான் செய்வான்.)
• வைத்திய ஞானமின்றி வைத்தியம் பார்ப்பது.
• எறும்பு, தேனீ, மரங்கொத்தி பறவை ({ஹத் {ஹத்) இவைகளைக் கொல்வது.
• தனது சுவரில் பலகை ஒன்றை நட்டுக் கொள்ள அண்டை வீட்டாரைத் தடுப்பது.
• கையால் சைகை செய்து ஸலாம் சொல்வது.
• தெரிந்தவர்களுக்கு மட்டும் ஸலாம் சொல்வது. (தெரிந்தவர்கள், தெரியாதவர்கள் எல்லோருக்கும் ஸலாம் சொல்ல வேண்டும்.)
• ஸலாம் சொல்லாமல் பேசியவருக்கு பதில் சொல்வது.
• ஒரு ஆண் மற்றொரு ஆணை, ஒரு பெண் மற்றொரு பெண்ணை இச்சையுடன் முத்தமிடுவது.
• கோபமாக இருக்கும்போது தீர்ப்பளிப்பது.
• அடுத்தவரின் வாதத்தை கேட்காமல் ஒருவரின் வாதத்தை மட்டும் கேட்டுவிட்டு தீர்ப்பளிப்பது.
• சூரியன் மறையும் (மஃரிப்) நேரத்தில் பிள்ளைகளை வீட்டிலிருந்து வெளியில் அழைத்துச் செல்வது. (முழுமையாக இருட்டிய பின் வேண்டுமானால் அழைத்துச் செல்லலாம். ஏனெனில், அது ஷைத்தான்கள் பரவும் நேரமாகும்.).
• இரவில் பழங்களை மரத்திலிருந்து பறிப்பது.
• இரவில் அறுவடை செய்வது. (இவ்வாறு செய்வதால் ஏழை, எளியோருக்கு அது தெரியாமல் ஆகிவிடலாம். அறுவடை அன்றே அதில் கடமையான தர்மத்தை கொடுத்துவிட வேண்டுமென்று அல்லாஹ் கூறியிருப்பதால் ஏழைகளை தவிர்ப்பதற்காக இவ்வாறு சூழ்ச்சி செய்வது கூடாது.)
• கடைத் தெருவில் நடந்து செல்லும்போது மற்றவர்களுக்கு இடையூறு தரும்படியான, காயப்படுத்தும்படியான பொருள்களை எடுத்துச் செல்வது.
• காலரா பரவியிருக்கும் ஊரிலிருந்து வெளியேறுவது, அந்த ஊருக்குச் செல்வது.
• வெள்ளி, சனி, ஞாயிறு, புதன் ஆகிய கிழமைகளில் இரத்தம் குத்தி எடுப்பது. (வியாழன், திங்கள், செவ்வாய் ஆகிய தினங்களில் எடுக்கலாம்.)
• தும்மியதற்குப்பின் அல்லாஹ்வை புகழாதவருக்கு (அல்ஹம்துலில்லாஹ் என்று சொல்லாதவருக்கு) யர்ஹமுக்கல்லாஹ் சொல்வது.
• கஅபாவின் திசையில் எச்சில் துப்புவது.
• இரவில் பயணம் செய்யும்போது பாதையின் ஓரங்களில் ஓய்வெடுப்பது.
• காற்று பிரியும் சத்தத்தைக் கேட்டு சிரிப்பது (இது எல்லோருக்கும் ஏற்படும் இயற்கையாகும். அவ்வாறு சிரிப்பதால் பிறருக்கு சங்கடம் ஏற்படலாம்.)
• நறுமணம், தலையணை, துளசி ஆகியவற்றை ஏற்றுக்கொள்ள மறுப்பது.

குழந்தைகளுக்கு இஸ்லாத்தை சொல்லி கொடுப்போம் . பாகம் 3

குர்ஆன் : குழந்தைகளின் புத்திக்கூர்மையை வளர்க்கும்

திருமறைக்குர்ஆனை மனனமிடுவதையும் அதன் கருத்துக்களை சிந்திப்பதையும் குழந்தைகளின் புத்திக் கூர்மையை வளர்க்கும் அதிமுக்கிய வாயில்களில் ஒன்றாகக் கருத முடியும். ஏனெனில், அல்குர்ஆன் அறிவின்பால், சிந்தனையின்பால் அழைக்கின்றது. புதுமை படைக்குமாறு புத்திக்கூர்மையை பயன்படுத்துமாறு அழைப்பு விடுக்கின்றது.

இது ஹல்வான் பல்கலைக்கழக உளவியல் துறை விரிவுரையாளர் இஸ்மாயீல் அப்துல் பத்தாஹ் அவர்கள் மெற்கொண்ட நவீன ஆய்வின் முடிவாகும். அல்குர்ஆனை மனனமிடுவதும் அதன் கருத்துக்களைச் சிந்திப்பதும் அது பற்றிய பரிபூரண அறிவைப் பெறுவதும் சிறியோரின் புத்திக் கூர்மையை அதிகரிக்கச் செய்கின்றது என்பதை இவரது ஆய்வு முடிவுகள் உறுதிப்படுத்தியுள்ளன.

உமது ஈமான் அதிகரிக்க வேண்டும். அறிவும் செயலும் இணைய வேண்டும் என்ற நோக்கில் அல்குர்ஆன் வானங்கள், பூமி பற்றியும், மனிதனைப் பற்றியும், எம்னைச் சூழ உள்ள பொருட்கள் பற்றியும் சிந்திக்குமாறு அழைப்பதை அவ்வாய்வில் அவர் விளக்குகின்றார். அப்துல் பத்தாஹ் அவர்கள் புஹாரி, அபூதாவூத், நஸஈ போன்ற ஹதீஸ் நூல்களில் வந்துள்ள ஹதீஸ்களையும் அதற்கு ஆதாரமாக எடுத்துக் காட்டுகிறார்.

அமர் இப்னு ஸலாமா அவர்கள் அறிவிக்கின்றார்கள் : எனது தந்தை (ஹிஜ்ரத்துக்கு முன்னர் கூறினார் – நான் அல்லாஹ் வின் தூதரிடம் இருந்து ஒரு செய்தி கொண்டு வந்திருக்கிறேன். அல்லாஹ்வின் தூதர் பின்வருமாறு கூறினார்கள் :

உங்களுக்குத் தொழுகையின் நேரம் வந்து விட்டால் உங்களில் ஒருவர் பாங்கு சொல்லட்டும். அல்குர்ஆனை நன்கு மனனமிட்டவர் ஜமாஅத் நடத்தட்டும். அம்ர் இப்னு மஸ்லமா கூறுகிறார் : அப்போது எல்லோரும் உற்று நோக்கினர். அவ்விடத்தில் அதிகம் மனனமிட்டவர் என்னைத் தவிர வேறு எவரும் இருக்கவில்லை. நான் ஏழு வயதுச் சிறுவனாக இருந்த நிலையிலும் என்னையே முற்படுத்தினார்கள்.

ரஸூலுல்லாஹ் மதீனாவுக்கு வருவதற்கு முன்னர் மதீனாவில் முஸ்லிம்களுக்குத் தொழுகை நடத்திய இச்சிறுவன் மக்காவிலிருந்து குர்ஆனைச் சுமந்து வரும் பயணிகளிடமிருந்து குர்ஆனைச் செவிமடுத்தான். அவனுக்கு இறைவன் கொடுத்த திறமை, மனன ஆற்றல் என்பவற்றைப் பயன்படுத்தி அல்குர்ஆனில் அதிகமான பகுதியை மனனம் செய்திருந்தான். இதன் மூலம் மக்களை வைத்து ஜமாஅத் நடத்த தகுதி பெற்றான்.

குழந்தைகளின் புத்திக் கூர்மையை வளர்ப்பதில் பள்ளிவாசல்களும், முக்கிய பங்காற்றுவதை இந்த ஆய்வு தெளிவுபடுத்துகின்றது. பள்ளிவாசல் குழந்தைகளிடத்தில் நல்ல நடத்தைகள், ஒழுக்கங்களை, சிறந்த மார்க்க விழுமியங்களை பரப்புவதிலும், போதிப்பதிலும் ஈடுபடுகின்றது. குழந்தைகளை அது வாழும் நடைமுறை உலகுடன் பள்ளிவாசல் பிணைக்கிறது.

பள்ளிவாசல் குழந்தைகளிடத்தில் நல்ல பல தாக்கங்களை ஏற்படுத்துகின்றது. குறிப்பாக, அவர்கள் ஏழு வயதை அடையும் போது அதன் பங்களிப்பு விரிவடைந்து குழந்தைகளின் ஆறிவாற்றலை வளர்க்கும் வகையிலும் அதன் பகுத்தறிவுக்கு புத்துயிர் ஊட்டும் வகையிலும் குர்ஆனுடைய மனன சக்தி அமைகின்றது. இவ்வாறு சிறு பிராயத்திலேயே குழந்தையிடம் பூரண வளர்ச்சியை ஏற்படுத்துவதில் பள்ளிவாசல் முக்கிய பங்கு வகிக்கின்றது.

புத்தி கூர்மையை ஏற்படுத்துவதில் பரம்பரைக் காரணிகள் தாக்கம் செலுத்திய போதிலும் அது முயற்சியின் மூலமும் கடின உழைப்பின் மூலமுமே துரிதப்படுத்தப்படுகின்றது என்பதை இவ்வாய்வு காட்டுகிறது. குழந்தைகளின் புத்தி கூர்மையை வளர்ப்பதில் குடும்பம், கல்வி, தகவல் தொடர்பு, வணக்க வழிபாடுகள் போன்ற பல்வேறு காரணிகளும் பங்காற்றுகின்றன.

இணை வைத்தல் கொடியது

ஐந்து வேளைத் தொழுகையை விட தர்ஹாக்களில் கையேந்துவதை புனிதமாகக் கருதுபவர்கள். பாத்திஹாக்கள் ஓதி இறைவனின் அன்பைப் பெற்றுவிடலாம் என்று தப்புக்கணக்கு போடுகிறார்கள். என்னிடமே கேளுங்கள் என்று இறைமறையில் அல்லாஹ் சொல்லும் வாக்குகளை பொய்யாக்குபவர்களாக நமது அறியாமையினால் அவுலியாக்களிடம் சென்று கேட்கக்கூடியவர்களாக இருக்கிறோம். சிலை வணக்கங்களையும்; கப்று வணக்கங்களையும் ஒழிக்க ரசூல் (ஸல்) அவர்கள் பட்ட சிரமங்களை மறந்தவர்களாக. ரசூல் (ஸல்) அவர்களின் அடிப்படைக் கொள்கைகளைக் கூட மதிக்காதவர்களாக நாம் அறிந்தோ அறியாமலோ இஸ்லாத்திற்கு கடுமையாக ஊறு விளைத்துக் கொண்டிருக்கிறோம்;. சிந்தித்து திருந்துவோமா.
1. தான் பணக்காரனாக வேண்டும் , வீடு வாங்க வேண்டும் , தன் குடும்ப சிக்கல்கள் தீர வேண்டும் என்பதற்காக காஃபிரான சாமியார்களிடம் தன் குடும்பப் பெண்களைக் கூட அழைத்துச் சென்று குறி பார்ப்பது.அவன் மந்திரித்துக் கொடுக்கும் தாயத்துகளை அணிந்தும் , சாம்பிராணி , மற்ற படைத்தப் பொருள்களை உண்டும் , கபட சாமியார்கள் எழுதித்தரும் தகடுகளை வீடுகளில் மாட்டி வைத்தும்; அல்லாஹ்வுக்கு இனைவைக்கும் கொடுமையான செயல்களை செய்ய தயங்குவதில்லை.  

2. நம் தாத்தா, பாட்டன் என்று குடும்பத்தில் இறந்தவர்களுக்காக ஹஜ்ரத்தை வைத்து ஓதி விட்டால் எல்லா பாவங்களும் மன்னிக்கப்படும் என்று 3ம் நாள் பாத்தியா 7 ம் நாள் பாத்தியா 40 ம் நாள் பாத்தியா என்றும் உறவினர்களை அழைத்து விருந்து வைத்து விமரிசையாக செய்கிறோம். இதன் மூலம் ஹஜ்ரத்கள்தான் கொஞ்சம் வயிறார உண்டு கையில் கொஞ்சம் காசு பார்த்து விட்டு நமக்கு பாவச்சுமையை இணைவைத்தலின் மூலம் அதிகமாக்கி விட்டுப் போகிறாரே தவிர. யார் செய்த பாவத்தையும் ஹஜ்ரத் ஓதும் பாத்தியா,மொளலூது, ஹத்தம் எதுவும் இறைவனிடம் காப்பாற்றாது. அவனவன் செய்த பாவத்திற்கு இறைவனிடம் பதில் சொல்லியாக வேண்டும். நாம் செய்த நல்ல அமல்கள் கூட வரும். ஹஜ்ரத்களின் பாத்தியாக்கள் கூட வராது. பாத்தியாக்கள் பாவத்தை கூட்டி விடும்.  

3. தர்ஹாக்களில் தவம் கிடக்கிறோம். தர்ஹாக்களுக்கு செல்வதை இஸ்லாம் ஆதரிப்பதாய் இருந்தால் இன்று ரசூல் (ஸல்) அவர்களுக்குதான் பெரிய தர்ஹா இருந்திருக்க வேண்டும். தர்ஹாக்கள் பொய்யானவை என்பதற்கு நிறைய ஆதாரம் இருந்தும் நாம் இந்த மார்க்கத்திற்கு ஊறு விளைவிக்கும் செயலை ஒரு மார்க்க கடமை என்று செய்து வருகிறோம். தர்ஹாக்களை அண்டிப் பிழைத்து வாழும் ஒரு கூட்டம் நன்றாக செழிப்பாகி வருகிறது. நம் பெண்கள் கூட்டமும் தர்ஹா கூட்டங்களில் கண்டவர்களிடமும் இடிபட்டுக் கொண்டுதான் இருக்கிறார்கள். தர்ஹாக்கள்,மௌலுது,ஹத்தம் பாத்தியா, பூரியான் பாத்தியா,ஒடுக்கத்து புதன், 3,7,40 பாத்தியா...போன்றவைகள் பொய், பித்தலாட்டம், தனிப்பட்ட நபர்கள் பையை நிரப்பிக் கொள்ள மார்க்கம் என்ற பெயரில் புகுத்தப்பட்டவைகள் என்பதற்கு குர்ஆன், ஹதீஸ் அடிப்படையில் நிறைய ஆதாரங்கள் இருக்கின்றது. இவைகள் எல்லாம் உண்டு மார்க்கம் அனுமதிக்கிறது என்பதற்கு மௌலூது, பாத்தியா ஒதி நவீன பிச்சை எடுக்கும் சில ஹஜ்ரத்கள் குர்ஆன், ஹதீஸ் அடிப்படையில் நிருபிக்கத் தயாராய் இருக்கிறார்களா முன் வருவார்களா. நிச்சயம் வர மாட்டார்கள். ஏனென்றால் அவர்கள் பிழைப்பு கெட்டு விடும். அந்நிய கலாச்சாரத்திலிருந்து நமக்கு தொற்றிய நோய் இது. 

அவர்கள் கருமாதி, திவசம் செய்கிறார்கள் 

நாம் 3,7,40...பாத்தியா என்று நிறைய வெரைட்டி பாத்தியா உண்டு.

அவர்கள் கோயிலுக்குப் போனால் 

நாங்க பள்ளிக்குப் போய் தொழ மாட்டோம் மாறாக தர்ஹாவுக்கு தவறாமல் போவோம்.

அவர்கள் தேர் இழுத்தால் 

நாங்கள் சந்தனக் கூடு...

பேர் மட்டும் அப்துல்லா(அப்துல்லா:அர்த்தம் - அல்லாஹ்வின் அடிமை ) பாக்கி எல்லாம் அவர்கள் செய்வதை பேர் மாற்றி செய்யும் கலாச்சாரத்தைத்தான் பின்பற்றி வருகிறோம்;.

நம் மார்க்கத்தையே மரணிக்கச் செய்யும் செயல்களை இங்கு பார்ப்போம். இஸ்லாத்தை முறிக்கும் காரியங்கள் ,
.1. அல்லாஹ்வை வணங்கும் கடமைகளில் அவனுக்கு இணை வைப்பது அல்லாஹ் தனது திருமறையில் கூறுகிறான்: 'நிச்சயமாக அல்லாஹ் தனக்கு இணை வைக்கப்படுவதை மன்னிக்க(வே) மாட்டான் இதனைத்தவிர(மற்ற) எதனையும் தான் நாடியோருக்கு மன்னிப்பான்' (2 : 48)
மரணித்தவர்களிடம் (அவர்களை அழைத்துப்) பிரார்த்தனை செய்வதும் அவர்களைக் கொண்டு உதவி தேடுவதும், அவர்களுக்காக நேர்ச்சை செய்வதும், அவர்களுக்காக அறுத்துப் பலியிடுவதும் அல்லாஹ்வுக்கு இணை வைத்தலில் நின்றுமுள்ளது.
2. யார் தனக்கும் அல்லாஹ்வுக்கும் மத்தியில் இடைத்தரகர்களை ஏற்படுத்தி, அவர்களை அழைத்து அவர்களிலேயே நம்பிக்கையும் வைக்கின்றானோ அவன் ஏகோபித்த முடிவின் படி காஃபிராகி விட்டான்.
3. இணை வைப்பவர்களை யார் காஃபிர்களாக கணிக்கவில்லையோ, அல்லது குப்ரில் சந்தேகம் வைக்கின்றானோ, அல்லது அவர்களுடைய மார்க்கம் சரி என கருதுகின்றானோ அவன் காஃபிராகி விட்டான்
4.யார் நாயகம் (ஸல்) அவர்களுடைய மார்க்கம் அல்லாத வேறு ஒரு மார்க்கத்தை சிறந்ததாகக் கருதுகின்றானோ, அவன் காபிராகிவிட்டான்.
5. நாயகம் (ஸல்) அவர்களுடைய மார்க்கத்தில் ஏதாவதொன்றை வெறுத்த நிலையில் அமல் செய்தால் அவன் திடமாக காபிராகிவிட்டான். திருமறை இவ்வாறு கூறுகிறது. 'இது (ஏனெனில்) அல்லாஹ் இறக்கி வைத்ததை நிச்சயமாக அவர்கள் வெறுத்து விட்டார்கள் என்ற காரணத்தினாலாகும். ஆதலால் அவர்களுடைய செயல்களையெல்லாம் (அல்லாஹ்வாகிய) அவன் அழித்து விட்டான்.' (47:9)
6. நாயகம் (ஸல்) அவர்களுடைய தீனில் ஏதாவதொன்றை யார் பரிகாசம் செய்கின்றானோ அவன் காபிராகிவிட்டான். திருமறையில் அல்லாஹ் இவ்வாறு கூறுகின்றான் '(அதற்கு நபியே அவர்களிடம்) அல்லாஹ்வையும், அவனது வசனங்களையும், அவனது தூதரையுமா நீங்கள் பரிகசித்துக் கொண்டிருந்தீர்கள் என்று நீர் கேட்பீராக. ( 9 : 65 )
7. சூனியம் செய்தல், யார் சூனியம்;; செய்கின்றானோ, அல்லது அதைப் பொருந்திக் கொள்கின்றானோ அவன் காபிராகிவிட்டான். திருமறை கூறுகிறது. ' மேலும் அவ்விருவரும், நாங்கள் சோதனையாக இருக்கிறோம் ஆதலால் (இதைக்கற்று) நீ காபிராகிவிட வேண்டாம் ' என்று கூறும் வரை அவர்கள் (அதனை) ஒருவருக்கும் கற்றுக்கொடுப்பதில்லை ' ( 2 : 102 )
8. முஸ்லிம்களுக்கு எதிராக முஸ்ரிக்கீன்(காபிர்)களோடு தோளோடு தோள் நின்று உதவி செய்தல் திருமறை கூறுகிறது ' உங்களில் எவரேனும் அவர்களை (த்தனக்கு) ப்பாதுகாவலராக்கிக் கொண்டால். அப்போது நிச்சயமாக அவரும் அவர்களில் உள்ளவர்தாம். ( 5 : 51 )
9. மனிதர்களில் நின்றும் சிலர் (தரீக்கா, சூபிய்யாக்களுடைய ஷேய்க் மார்களைப் போன்றவர்கள்) உயர்ந்த அந்தஸ்து அடைந்து விட்டார்கள் அவர்கள் நபியவர்கள் மார்க்கத்தை பின் பற்றத் தேவையில்லை அவர் அதிலருந்து வெளியாகலாம் என்று யார் கருதுகின்றானோ அவன் காபிராகிவிட்டான். திருமறை கூறுவதாவது: ' இன்னும் இஸ்லாம் அல்லாததை மார்க்கமாக எவராவது தேடினால், அப்பொழுது அவரிடமிருந்து அது அங்கீகரிக்கப்படவே மாட்டாது. மேலும் மறுமையில் அவர் நஷ்டமடைந்தோரில் இருப்பார்.' (3 : 85)
10. அல்லாஹ்வுடைய தீனைக் கற்றுக்கொள்ளாமலும் அதன்படி அமல் செய்யாமலும் அதைப் புறக்கணித்து விடுவது. திருமறை கூறுகிறது. 'மேலும் தன்னுடைய இரட்சகனின் வசனங்களைக் கொண்நினைவு படுத்தப்பட்டு அதன் பின்னர் அவைகளைப் புறக்கணித்து விடுகிறவனைவிட மிக அநியாயக்காரன் யார் ? நிச்சயமாக நாம் (இத்தகைய) குற்றவாளிகளை (அவர்களின் முந்திய பாவத்திற்காக ) தண்டிக்கக்கூடியவர்களாவோம் ( 32 : 22 )
அல்லாஹ்விற்கு கோபத்தை உண்டாக்கும் இணை வைத்தல் எனும் மன்னிக்க முடியாத குற்றத்திற்கு ஆளாகாமல் நாம் ஒவ்வொருவரும் நம்மையும், நம் குடும்பத்தினரையும் காத்து இஸ்லாம் தடுப்பவைகளிலிருந்து விலகியும் நன்மைகள் செய்பவர்களாகவும் விளங்குவோம்.

அதிகமாகக் கஷ்டப்பட! கூடுதலான நன்மைகள் கிடைக்குமா?

மனிதன் பொதுவாகவே ஒரு கஷ்டமான காரியத்தை முடித்த மற்றொருவனைப் பார்த்து இந்த வேலையை இவன் இவ்வளவு கஷ்டப்பட்டுச் செய்திருக்கிறான். அதனால் அவனுக்குப் பலன் அதிகம். அவன் நிச்சயமாக உழைப்பாளிதான். 

• அவன் கஷ்டப்பட்டு இவ்வளவு தூரம் நடந்திருக்கிறான். வாகனம் இருந்தும் அவன் நன்மை நாடி நடந்துள்ளான். 

• நடந்து செய்யும் இவ்வமலில் தான் கஷ்டத்தை உணரவேண்டும் என்பதற்காக நோன்பில்லா விட்டாலும் உண்ணாமலும், நீரருந்தாமலும் பசியுடன் நடந்துள்ளான். 
  

• நிழலில் நடக்காது வெய்யிலில் தலைதிறந்து நடந்துள்ளான். அவனது பக்தி எங்களுக்கு வருமா!? 

ஆச்சரியத்தோடு கேள்வி கேட்கும் மக்கள் கூட்டத்தை இந்த 21ம் நூற்றாண்டிலேயும் பார்க்கிறோம்.

இதுமட்டுமல்ல, இன்னும் பலர் அதிகமாகக் கஷ்டப்பட்ட அளவிற்கு கூடுதலான நன்மைகள் கிடைக்கும் என்று நினைத்து அல்லாஹ் எங்களுக்கு அளித்திருக்கக் கூடிய சலுகைகளைக் கூட ஒதுக்கி விடுபவர்களைப் பார்க்கிறோம். வாகன வசதியிருக்கும்போது வேண்டுமென்றே நடந்து செல்வது. நடந்து செல்வதற்கும் தூர வழியைத் தெரிவு செய்வது. தங்குமிட வசதிகளில் கஷ்டமானதைத் தெரிவு செய்வது. இப்படி எந்தவொரு செயலை எடுத்துக் கொண்டாலும் அதில் கஷ்டமானதையே செய்ய முன்வருவது.

அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் ஒரு காரியத்தைச் செய்யும் போது அந்தக் காரியம் எளிதான முறையில் செய்வதற்கு முடியுமானதாக இருந்தால் அந்த வழியையே தெரிவு செய்தார்கள். ஹஜ்ஜின் போது அவர்கள் ஒட்டகை மீதே பயணம் செய்திருக்கிறார்கள்.

அல்லாஹ் கூறுவதைப் பின்பற்றுபவர்கள் வழிதவறி விட மாட்டார்கள்:

நீர் கஷ்டப்படுவதற்காக குர்ஆனை உம்மீது நாம் இறக்கவில்லை. (அல்-குர்ஆன் 20:1)

அல்லாஹ் உங்களுக்கு இலகுவை நாடுகிறான், அவன் உங்களுக்குச் சிரமத்தை நாடவில்லை. (அல்-குர்ஆன் 2:185 வசனத்தின் ஒரு பகுதி)

இந்தக் குர்ஆன் வசனங்களுடன் நாம் கவனத்திற்கெடுக்க வேண்டிய ஒரு ஹதீஸைப் பார்ப்போம்:

ஒரு முதியவர் தமது இரண்டு புதல்வர்(கள் தம்மைத் தோள்களில் தாங்கிக் கொண்டிருக்க, அவர்)களிடையே தொங்கியபடி கால்கள் பூமியில் இழுபட வந்து கொண்டிருந்ததைக் கண்ட நபி ஸல்லல்லாஹு அலைஹி வஸல்லம் அவர்கள், ''இவருக்கு என்ன நேர்ந்தது?'' என்று கேட்டார்கள். ''(கஅபா வரை) நடந்து செல்வதாக இவர் நேர்ச்சை செய்திருக்கிறார்!'' என்று மக்கள் கூறினார்கள். நபி ஸல்லல்லாஹு அலைஹி வஸல்லம், ''இவர் தம்மை இவ்விதம் வேதனைப் படுத்திக் கொள்வது அல்லாஹ்வுக்குத் தேவையற்றது!'' என்று கூறிவிட்டு, அவரை வாகனத்தில் ஏறிச் செல்லுமாறு உத்தரவிட்டார்கள். (அறிவிப்பவர்: அனஸ் பின் மாலிக் ரளியல்லாஹு அன்ஹு. நூற்கள்: புகாரி, முஸ்லிம்)

நம்மைப் படைத்து நமது வாழ்க்கைக்குத் தேவையான எல்லாவற்றையும் நமக்கு வசமாக்கித் தந்திருக்கிறான். அப்படி வசமாக்கித் தந்திருப்பது ஏன் என்ற சிந்தனை கூட இல்லாமல் இன்று நாம் நடந்து கொண்டிருக்கிறோம். 

உக்பா பின் ஆமிர் ரளியல்லாஹு அன்ஹு அவர்கள் கூறியதாவது:

என் சகோதரி கஅபா வரை நடந்து செல்வதாக நேர்ச்சை செய்தார். அவர், இதுபற்றி நபி ஸல்லல்லாஹு அலைஹி வஸல்லம் அவர்களிடம் தீர்ப்புப் பெறும்படி எனக்கு உத்தரவிட்டார். நான் நபி ஸல்லல்லாஹு அலைஹி வஸல்லம் அவர்களிடம் விளக்கம் கேட்டேன். அதற்கு நபி ஸல்லல்லாஹு அலைஹி வஸல்லம் அவர்கள், ''அவர் (சிறிது தூரம்) நடந்து விட்டு வாகனத்தில் ஏறிக் கொள்ளட்டும்,'' என்றார்கள். (நூற்கள்: புகாரி, முஸ்லிம், திர்மிதி)

இந்த சம்பவங்களிலிருந்து முஸ்லிம்கள் படிக்க வேண்டிய பாடம் என்ன என்பது மிகவும் தெளிவானது. 

• அல்லாஹ் தேவையற்றவன். 
• அவனுடைய திருப்தியைப் பெறுவதற்காக கஷ்டப்படக் கூடிய நேர்ச்சைகள் செய்ய வேண்டிய அவசியம் இல்லை.
  
•  இஸ்லாம் மனிதனுக்கு எளிமையான வாழ்க்கையையும் இலகுவான நடைமுறைகளையும் வகுத்துத் தந்திருக்கிறது. 
  
• இஸ்லாம் நடுநிலைமையான அமைப்பில் இருந்து கொண்டுதான் நற்செயல்களைக் கூடச் செய்ய வேண்டும் என்பதை எப்போதும் உணர்த்திக் கொண்டிருக்கிறது.
  

தொழுகை என்ற கடமையில் அல்லாஹ் தந்திருக்கக் கூடிய சலுகைகளைக் கவனிக்கும் போது கஷ்டப்பட்டுத்தான் நல்லமல்களைச் செய்ய வேண்டும் என்ற பேச்சுக்கே இஸ்லாத்தில் இடமில்லை.

 வுளுவுக்குப் பதிலாக தயம்மும் செய்வது.

 வுளுவின் போது காலுறைக்கு மேல் மஸ்ஹு செய்வது.

 பெருமழையின் போது பள்ளியில் மஃரிப் தொழுகையுடன் இஷாத் தொழுகையையும் சேர்த்துத் தொழுவது.

 பெருமழையின் போது வீடுகளிலேயே தொழுது கொள்ளும்படி அறிவித்ததன் மூலம் அனுமதியளித்தது.

 பிரயாணத்தின் போது சேர்த்து, சுருக்கித் தொழுவதற்குள்ள அனுமதி.

இப்படி எத்தனையோ சலுகைகளை இஸ்லாம் எந்தக் கடமையை எடுத்துக் கொண்டாலும் அக்கடமையில் தந்திருக்கிறது. இவற்றின் உண்மையான அர்த்தம் என்ன என்று சிந்தித்தால் தெளிவு வரும்.

இன்று இஸ்லாமியர்கள் மத்தியில் பக்தி என்ற போர்வையில் பெரியார்கள் என்ற ஊர், பெயர் தெரியாத சந்நியாசிகளைப் பற்றிய கதைகள் கட்டவிழ்த்து விடப்பட்டுள்ளன. கஷ்டப்பட்ட அளவிற்கு பலன் உண்டு என்பதைப் போதிக்கத்தான் இந்தக் கதைகள். அப்படிப்பட்ட போதனைகள்தான் மற்றவனைச் சுரண்டி வாழ்வதற்கு பக்கபலமாக இருந்து கொண்டிருக்கிறது. 

இந்தக் கதைகளுக்கும் நம்மைச் சூழவுள்ள மாற்றுமதத்தவர்களிடையே உள்ள அவர்களுடைய நம்பிக்கைகளுக்கும் வித்தியாசம் இல்லை. 

அவர்கள் ஒரு நம்பிக்கையைத் தம் கடவுளோடு சம்பந்தப்படுத்திக் கூறும் போது, முஸ்லிம்களிலும் பலர் அதற்குப் போட்டியாகக் கதைகளை எழுதிப் பள்ளிபள்ளியாக விற்பனை செய்து கொண்டிருக்கிறார்கள்.

கஷ்டப்பட்டால்தான் இறைவனை நெருங்க முடியும் என்பதுதான் அவர்களின் சித்தாந்தம். அதனால்தான், அவர்களின் கதைப்புத்தகங்களிலே:

ஒவ்வொரு நாளும் 1000 ரக்அத்கள் ஸுன்னத்தான தொழுகை தொழுத பெரியார்.

40 வருடங்கள் ஒரே வுளுவில் இஷாவையும் ஸுப்ஹையும் தொழுத பெரியார்.

தஸ்பீஹ் செய்யும் காலணியைக் கனவில் கண்ட பிரபல சூஃபி.

அல்லாஹ்வின் மீதிருந்த பேரின்பக் காதலில் மூழ்கி அறுபது வருடமாக அழுத பெரியார்.

எல்லா மாதங்களும் ரமளானே என்று வரித்த பெண் பெரியார்.

15 ஆண்டுகள் படுக்காத பெரியார்.

கப்ரில் தொழுத பெரியார்.

போன்ற பெரும் பெரும் கப்ஸாக்கள் கட்டவிழ்த்து விடப்பட்டுள்ளன. 

இஸ்லாம் என்ன சொல்கிறது என்பதைச் சிந்திப்பவர்கள் மிகக் குறைவாகவே இருக்கிறார்கள். இப்படிப்பட்ட கதைகளை குர்ஆன், ஹதீஸைவிட மதிப்புக் கொடுத்துப் பின்பற்றுபவர்கள்தான் இன்று அதிகம்.

குர்ஆன், ஹதீஸை விட்டு விட்டுக் கொஞ்சக் காலம் மத்ஹபுகளைப் பின்பற்றினார்கள். இன்று மத்ஹபுகளோடு இந்த கப்ஸாக்களையும் சேர்த்து புதிய மத்ஹபொன்றை ஆரம்பித்துப் பள்ளி பள்ளியாகப் போதித்து அங்கேயே பள்ளி கொள்கிறார்கள்.

எல்லாவற்றையும் அல்லாஹ் பார்த்துக் கொள்வான். முஸ்லிம் என்று சொல்பவன் தன்னைத் தானே வருத்திக் கொண்டு அவனை வணங்கிக் கொண்டிருக்க வேண்டும். எவ்வளவு கஷ்டப்பட முடியுமோ அவ்வளவு கஷ்டப்பட வேண்டும். அப்போதுதான் அதிகமான நன்மை?

அல்லாஹ் பார்த்துக் கொண்டிருக்கின்றான் என்பதில் எந்தத் தர்க்கமும் இல்லை. அவன் பார்த்துக் கொண்டிருப்பதற்கு மட்டுமுள்ளவனல்ல. கேள்வி கணக்குக் கேட்பதிலும் மிகவும் கண்டிப்பானவன். அல்லாஹ் சொல்கிறான்:

நிச்சயமாக உமதிரட்சகன், மனிதர்களுக்கு அவர்களின் அக்கிரமங்களுக்காக மன்னிப்பை உடையவன், (அவ்வாறே) நிச்சயமாக உமதிரட்சகன் தண்டிப்பதிலும் மிகக் கடுமையானவன். (அல்-குர்ஆன் 13:6)

மார்க்கத்தில் அவன் எங்களுக்குக் கஷ்டத்தை வைக்கவில்லை. அவன் எங்களுக்குக் கூறுவதெல்லாம் அவன் ஆகுமாக்கியவற்றை ஏற்றுத் தடுத்தவற்றிலிருந்து விலகி நடக்கும்படிதான்.

எல்லாவற்றிற்கும் முத்தாய்ப்பு வைத்தாற்போல் அவன் இட்டிருக்கும் கட்டளைதான்.

ஒரு விடயத்தில் நீங்கள் தர்க்கித்துக் கொண்டால் அவ்விடயத்தை அல்லாஹ்வின் பக்கமும் அவன் திருத்தூதரின் பக்கமும் திருப்புங்கள். (அல்-குர்ஆன் 4:59)

இப்படித் தெளிவான மார்க்கத்தை அல்லாஹ் தந்திருக்கும் போது இன்று பலர் மக்களை வழிகெடுத்துக் கொண்டிருக்கிறார்கள். வழிகெடுத்துக் கொண்டிருக்கிறார்கள் என்று ஒரு பகுதியினரைக் குறை சொல்வதை விட பலர் தாமாகவே வழிகேட்டிலாகிக் கொண்டிருக்கிறார்கள் என்பதுதான் சரியான விளக்கமாகும்.

இன்று சந்தையில் வரக்கூடிய எந்தவொரு பொருளாக இருந்தாலும் அதை இயக்கும் விதத்தைத் தனது பெயரைக் கூட எழுதத் தெரியாதவர்களெல்லாம் படித்துக் கொள்கிறார்கள்.

மறுமையின் வெற்றியைத் தரக்கூடிய மார்க்கத்தை மட்டும் படிக்கவோ அதன் அறிவுரைகள் பற்றிச் சிந்திக்கவோ அவர்கள் முற்படுவதில்லை. காரணங்கள் இல்லாமலில்லை:

ஒன்று, ஏற்கனவே மௌலவிப் பட்டம் பெற்ற பலர், குர்ஆனை எல்லாருக்கும் விளங்க முடியாது என்று பிரச்சாரம் செய்வது. 

இரண்டு, அப்படிப் பிரச்சாரம் செய்பவர்கள் மற்றவர்கள் குர்ஆனைப் படித்து விடக்கூடாது என்பதற்காக வியூகம் அமைத்து படிக்க முடியும் என்று சொல்பவர்களை பகிரங்கமாக மானபங்கப் படுத்தவும் தயாரான நிலையிலே இருந்து கொண்டிருப்பது.

மூன்று, அப்படியும் அவர்கள் குர்ஆனைப் படிக்க முற்படும் பட்சத்தில், அதற்காக மக்களை ஏவும் பட்சத்தில், அவர்களின் சொத்துக்களைத் தீயிட்டுக் கொளுத்திப் பயம் காட்டுவது.

நான்கு, இப்படிப்பட்ட இருட்டடி மஸ்தான் வேலை செய்யும் சிலர் இன்று சமூகத்திலே உலமாக்களாகவும், பள்ளி நிருவாகிகளாகவும் இருப்பதுதான் இன்று நமது சமூக அமைப்பின் இலட்சணமாகிக் கொண்டு வருவது.

இஸ்லாம் எளிமையானது. அதன் சட்டங்கள் அல்லாஹ்வினால் ஆக்கப்பட்டவை. அந்தச் சட்டங்கள் அமல்படுத்தப்படுவதற்கு மிகவும் இலகுவானவை. இதை முஸ்லிம்கள் மறந்து செயல்பட எத்தனிக்கக் கூடாது. அப்படியிருந்தால்தான் அவன் எங்களுக்கு நேர்வழியைக் காட்டுவான். அப்படியல்லாமல், அவனுடைய சட்டங்களில் இடைச்செருகல்களைப் புகுத்த நாம் முற்பட்டால் அவன் மிகவும் கோபக்காரன் மட்டுமல்ல, அவனுடைய அதிகார எல்லைக்குள் புகுந்தவர்களை அவன் சும்மா விடமாட்டான். 

இவற்றைக் கவனமாக, உன்னிப்பாக உணர்ந்து அவனுக்குக் கீழ்ப்படிவோமாக. அவன் கட்டளையிட்டபடி அவனது தூதர் ஸல்லல்லாஹு அலைஹி வஸல்லம் அவர்களைப் பின்பற்றி மறுமையில் நமது வெற்றியை உறுதிப்படுத்திக் கொள்வோமாக. அப்படி நமது வாழ்க்கையை அமைத்துக் கொள்வது அந்தப் பெருநெருப்பினாலான நரகிலிருந்து பாதுகாப்புப் பெற ஒரு காரணியாக அமையும்

சின்ன சின்ன அமல்கள் - சிறப்பு சேர்க்கும் நன்மைகள்

சின்ன சின்ன அமல்கள் - சிறப்பு சேர்க்கும் நன்மைகள்

அல்லாஹ்வையும் அவனுடைய தூதரையும் நம்பிக்கை கொண்டவர்கள் சொர்க்கத்திற்குச் செல்ல வேண்டும் என்றால் நம்பிக்கை மட்டும் போதாது. அத்துடன் நல்ல செயல்களும் அவசியம். இதைப் பற்றி அல்லாஹ் தன் திருமறையில் இவ்வாறு கூறுகின்றான். 

நம்பிக்கை கொண்டு, நல்லறங்கள் செய்தோரை சொர்க்கச் சோலைகளில் நுழையச் செய்வோம். அவற்றின் கீழ்ப்பகுதியில் ஆறுகள் ஓடும். அதில் அவர்கள் என்றென்றும் நிரந்தரமாக இருப்பார்கள். (இது) அல்லாஹ்வின் உண்மையான வாக்குறுதி. அல்லாஹ்வை விட அதிக உண்மை பேசுபவன் யார்? (அல்குர்ஆன் 4:122)

ஒவ்வொருவருக்கும் முன்னோக்கும் இலக்கு உள்ளது. அவர் அதை நோக்குகிறார். எனவே நன்மைகளுக்கு முந்திக் கொள்ளுங்கள்! நீங்கள் எங்கே இருந்தாலும் உங்கள் அனைவரையும் அல்லாஹ் கொண்டு வருவான். அனைத்துப் பொருட்களின் மீதும் அல்லாஹ் ஆற்றலுடையவன். (அல்குர்ஆன் 2:148)

நம்பிக்கை கொண்டோரே! ருகூவு செய்யுங்கள்! ஸஜ்தாச் செய்யுங்கள்! உங்கள் இறைவனை வணங்குங்கள்! நன்மையைச் செய்யுங்கள்! நீங்கள் வெற்றி பெறுவீர்கள். (அல்குர்ஆன் 22:77)

நபி (ஸல்) அவர்கள் கூறுகின்றார்கள்.

இருள் நிறைந்த ஒரு பகுதியைப் போன்று (வரவிருக்கும்) குழப்பத்திற்கு (முன்னால்) நற்செயல்களில் போட்டி இடுங்கள். (அந்தக் குழப்பம் வந்தால்) ஒரு மனிதன் முஃமினாக காலைப் பொழுதை அடைந்து மாலையில் காஃபிராகி விடுவான். அல்லது மாலையில் முஃமினாக இருப்பவன் காலையில் காஃபிராகி விடுவான். உலகத்தின் செல்வங்களுக்காகத் தனது மார்க்கத்தை விற்று விடுவான்.அறிவிப்பவர்: அபூஹுரைரா (ரலி) நூல்: முஸ்லிம் 186

மேற்கூறப்பட்ட குர்ஆன், ஹதீஸ் ஆதாரங்களிலிருந்து நல்ல செயல்களின் காரணமாகவே சுவனம் செல்ல முடியும் என்று தெரிகின்றது. 

நாம் ஒவ்வொரு நாளும் நம்மையே அறியாமல் எவ்வளவோ பாவங்கள் செய்து வருகின்றோம். அவற்றை அழிக்கும் கருவியாக இருக்கக் கூடிய நல்ல செயல்களை நாம் தொடர்ந்து செய்து வர வேண்டும். 

அவர்கள் தமது இறைவனின் திருப்தியை நாடி பொறுமையை மேற்கொள்வார்கள். தொழுகையை நிலை நாட்டுவார்கள். நாம் அவர்களுக்கு வழங்கியதிலிருந்து இரகசியமாகவும், வெளிப் படையாகவும் (நல் வழியில்) செலவிடுவார்கள். நன்மை மூலம் தீமையைத் தடுப்பார்கள். அவர்களுக்கே அவ்வுலகின் (நல்ல) முடிவு உண்டு. (அல்குர்ஆன் 13:22)

நன்மை என்றால் தொழுகை, நோன்பு, ஸகாத் இவை தான் நன்மை என்று நாம் நினைத்து வைத்துள்ளோம். இவை தவிர இன்னும் எவ்வளவோ நல்ல செயல்கள் உள்ளன. அவை அதிக நன்மைகளைப் பெற்றுத் தரக் கூடியதாகவும் உள்ளன. அவற்றை இப்போது பார்ப்போம்.

அல்லாஹ்வை நினைவு கூர்வது

எந்தச் சிரமத்தையும் எடுத்துக் கொள்ளாமல் சுப்ஹானல்லாஹி வபிஹம்திஹி சுப்ஹானல்லாஹில் அழீம் என்று கூறினால் அந்த வார்த்தைகள் அதிக நன்மைகளைப் பெற்றுத் தருகின்றன. 

இரண்டு வார்த்தைகள் நாவிற்கு எளிதானதாகவும், (நன்மையின் தராசில்) கனமானதாகவும் இருக்கின்றன. அவை, சுப்ஹானல்லாஹி வபிஹம்திஹி சுப்ஹானல்லாஹில் அழீம் என்று நபி (ஸல்) அவர்கள் கூறினார்கள். அறிவிப்பவர்: அபூஹுரைரா (ரலி) நூல்: புகாரி 7563

ஸலாம் கூறுதல்

இன்று முஸ்லிம்கள் என்று கூறிக் கொண்டு சிலர் ஸலாம் சொல்வதற்கு வெட்கப்படுவதைப் பார்க்கிறோம். ஸலாம் கூறுவதால் அவர்களுடைய அந்தஸ்து கெடுவதைப் போன்று நினைக்கிறார்கள். ஆனால் ஸலாம் கூறுதல் இஸ்லாத்தில் சிறந்த செயல் என்பதை அவர்கள் விளங்கவில்லை. 

ஒரு மனிதர் நபி (ஸல்) அவர்களிடம், ''இஸ்லாத்தில் சிறந்தது எது?'' என்று கேட்டார். அதற்கு நபி (ஸல்) அவர்கள், ''நீர் (மக்களுக்கு) உணவளிப்பதும், அறிந்தவருக்கும் அறியாதவருக்கும் நீர் ஸலாம் கூறுவதுமாகும்'' என்று கூறினார்கள். அறிவிப்பவர்: அப்துல்லாஹ் பின் அம்ர் (ரலி) நூல்: புகாரி 12

ஒரு மனிதர் நபி (ஸல்) அவர்களிடம் வந்து ''அஸ்ஸலாமு அலைக்கும்'' என்று கூறினார். அதற்கு நபியவர்கள் (பதில்) சலாமை அவருக்குக் கூறினார்கள். பிறகு அம்மனிதர் (சபையில்) அமர்ந்த போது ''(இவருக்கு) பத்து (நன்மைகள் கிடைத்து விட்டது)'' என்று கூறினார்கள். பிறகு மற்றொரு மனிதர் வந்து ''அஸ்ஸலாமு அலைக்கும் வரஹ்மதுல்லாஹ்'' என்று கூறினார். அவருக்கு நபியவர்கள் (பதில்) சலாமை திருப்பிக் கூறினார்கள். பிறகு அம்மனிதர் (சபையில்) அமர்ந்து கொண்டார். அப்போது ''(இவருக்கு) இருபது (நன்மைகள் கிடைத்து விட்டது)'' என நபி (ஸல்) அவர்கள் கூறினார்கள். (மூன்றாவதாக) மற்றொரு மனிதர் வந்து ''அஸ்ஸலாமு அலைக்கும் வரஹ்மதுல்லாஹி வபரகாத்துஹு'' என்று கூறினார். அவருக்கு நபியவர்கள் (பதில்) சலாமை திருப்பிச் சொன்னார்கள். பிறகு அம்மனிதர் அமர்ந்து கொண்டார். அப்போது நபி (ஸல்) அவர்கள் ''(இவருக்கு) முப்பது (நன்மைகள் கிடைத்து விட்டது)'' என்று கூறினார்கள். அறிவிப்பாளர்: இம்ரான் பின் ஹுஸைன் (ரலி) நூல்: திர்மிதீ 2613

தீங்கு தரும் பொருளை அகற்றுவது

நாம் செல்லும் பாதையில் மக்களுக்குத் தொல்லை தரும் பொருளை அகற்றினால் அதற்கும் நமக்கு நன்மை உண்டு. 

''ஒரு மனிதன் பாதையில் நடந்து சென்ற போது முற்கிளையைக் கண்டு அதை எடுத்து அகற்றிப் போட்டார். அவரின் இந்த நல்ல செயலை அல்லாஹ் ஏற்றுக் கொண்டு அவருக்குப் பாவமன்னிப்பு அளிக்கின்றான்'' என்று நபி (ஸல்) அவர்கள் சொன்னார்கள்.அறிவிப்பவர்: அபூஹுரைரா (ரலி)நூல்: புகாரி 2472

தொல்லை தரும் பொருளை அகற்றிப் போடுவது தர்மமாகும் என்று நபி (ஸல்) அவர்கள் கூறினார்கள்.

அறிவிப்பவர்: அபூஹுரைரா (ரலி)நூல்: புகாரி 246

நல்ல வார்த்தைகளைப் பேசுதல்

தேவையற்ற பேச்சுக்களைப் பேசாமல் நல்ல வார்த்தைகளைப் பேசுவதால் அதிக நன்மையை அடைய முடியும். 

நல்ல வார்த்தை பேசுவது தர்மமாகும் என்று நபி (ஸல்) அவர்கள் கூறினார்கள். அறிவிப்பவர்: அபூஹுரைரா (ரலி)நூல்: புகாரி 6023

பேரீச்சம் பழத்தின் கீற்றைக் கொண்டாவது நீங்கள் நரகத்தை விட்டுத் தப்பிக்க நினையுங்கள். இல்லையென்றால் நல்ல வார்த்தையின் மூலம் (நரகத்தை விட்டுத் தப்பியுங்கள்) என்று நபி (ஸல்) அவர்கள் கூறினார்கள். அறிவிப்பவர்: அபூஹுரைரா (ரலி)நூல்: புகாரி 6023

மற்றவருக்காகப் பிரார்த்தனை செய்தல்

மற்றவருக்காக நாம் துஆச் செய்தால் அதற்காக அதிக நன்மைகள் கிடைக்கின்றன. எத்தனையோ பேர் நம்மிடம் துஆச் செய்யும்படி சொல்லியிருப்பார்கள். அதை நாம் அலட்சியப்படுத்தாமல் நம்முடைய வாழ்வில் செயல்படுத்த வேண்டும். 

ஒரு மனிதன் தன்னுடைய சகோதரனுக்காக மறைவில் துஆச் செய்தால், ''உனக்கும் அவ்வாறே ஏற்படட்டும்'' என்று வானவர்கள் அவருக்காக வேண்டுவார்கள் என்று நபி (ஸல்) அவர்கள் கூறினார்கள்.

அறிவிப்பவர்: அபுத்தர்தா (ரலி) நூல்: அபூதாவூத் 1534

பிற முஸ்லிமைப் பார்த்து புன்னகை செய்தல்

வழியில் நாம் சந்திக்கும் ஒரு முஸ்லிமைப் பார்த்து நல்ல எண்ணத்துடன் புன்னகைத்தால் அதற்கும் நன்மை கிடைக்கும் என்று இஸ்லாம் கூறுகின்றது. இப்படிப்பட்ட ஓர் அருமையான மார்க்கத்தில் இருக்கும் நாம் அதன் சிறப்பைப் பற்றி தெரியாமல் இருக்கின்றோம். 

உன்னுடைய சகோதரனுடைய முகத்தைப் பார்த்து நீ சிரிப்பது கூட உனக்கு நன்மையாகும் என்று நபி (ஸல்) அவர்கள் கூறினார்கள்.அறிவிப்பவர்: அபூதர் (ரலி) நூல்: முஸ்லிம் 4760

கால்நடைகள் மீது இரக்கம் காட்டுதல்

ஒரு மனிதன் இன்னொரு மனிதனிடம் காட்டும் அன்புக்கு நன்மைகள் கிடைப்பது போன்று, விலங்கினத்தின் மீது இரக்கம் காட்டினால் அதற்கும் நன்மை உண்டு என்று இஸ்லாம் கூறுகின்றது. 

கால்நடைகளுக்குச் சூடு வைப்பதையும் போட்டியில் அது தோல்வியடைந்தால் அதைச் சுட்டுக் கொல்வதையும் பார்க்கும் மக்கள், இஸ்லாத்தின் இந்த உன்னதத் தன்மையைப் புரிந்து கொள்ள வேண்டும். 

''ஒரு மனிதர் பாதையில் நடந்து சென்று கொண்டிருந்த போது அவருக்குக் கடுமையான தாகம் ஏற்பட்டது. உடனே, அவர் (அங்கிருந்த) ஒரு கிணற்றில் இறங்கி, அதிலிருந்து (தண்ணீரை அள்ளிக்) குடித்தார். பிறகு கிணற்றிலிருந்து அவர் வெளியே வந்த போது நாய் ஒன்று தாகத்தால் தவித்து, நாக்கைத் தொங்க விட்டபடி ஈர மண்ணை நக்கிக் கொண்டிருப்பதைக் கண்டார். அவர் (தம் மனதிற்குள்) ''எனக்கு ஏற்பட்டதைப் போன்றே இந்த நாய்க்கும் (கடுமையான தாகம்) ஏற்பட்டிருக்கின்றது போலும்'' என்று எண்ணிக் கொண்டார். உடனே, (மீண்டும் கிணற்றில் இறங்கி, தண்ணீரைத்) தனது காலுறையில் நிரப்பிக் கொண்டு, அதை வாயால் கவ்விக் கொண்டு, மேலே ஏறி வந்து அந்த நாய்க்கும் புகட்டினார். அல்லாஹ் அவருடைய இந்த நற்செயலை ஏற்று அவரை (அவரது பாவங்களை) மன்னித்தான்'' என்று நபி (ஸல்) அவர்கள் கூறினார்கள்.

இதைச் செவியுற்ற நபித்தோழர்கள், ''அல்லாஹ்வின் தூதரே! கால்நடைகளுக்கு உதவும் விஷயத்திலும் எங்களுக்குப் பலன் கிடைக்குமா?'' என்று கேட்டார்கள். நபி (ஸல்) அவர்கள் ''ஆம்! உயிருடைய பிராணி ஒவ்வொன்றின் விஷயத்திலும் (அதற்கு உதவி செய்யும் பட்சத்தில் மறுமையில்) அதற்கான பிரதிபலன் கிடைக்கும்'' என்று கூறினார்கள். அறிவிப்பவர் அபூ ஹுரைரா(ரலி) நூல்: புகாரி 2363, 6009

குறைந்த தர்மம் அதிக நன்மை

நம்மில் அதிகமானோர் தர்மம் செய்யும் விஷயத்தைப் பற்றி தவறாகப் புரிந்து வைத்துள்ளனர். அதாவது அதிகமான பொருளைத் தான் தர்மம் செய்ய வேண்டும் என்று நினைக்கிறார்கள். அப்படியல்ல! தூய்மையான சம்பாத்தியத்தில், தூய்மையான எண்ணத்துடன் நம்மால் முடிந்ததை தர்மம் செய்தாலும் அதற்கு இறைவனிடம் கூலி உண்டு. நமக்கு அது அற்பமாகத் தெரிந்தாலும் இறைவனிடம் அது மிகப் பெரியதாக இருக்கும். 

எவர் முறையான சம்பாத்தியத்தில் ஒரு பேரீச்சம்பழத்தின் அளவு தர்மம் செய்தாரோ லி அல்லாஹ் பரிசுத்தமானதைத் தவிர வேறு எதையும் ஏற்றுக் கொள்ள மாட்டான் லி அதை அல்லாஹ் தனது வலக்கரத்தால் ஏற்றுக் கொண்டு, பிறகு நீங்கள் உங்கள் குதிரைக் குட்டியை வளர்ப்பது போன்று அதன் நன்மையை மலை போல் உயரும் அளவிற்கு வளர்த்து விடுவான் என்று நபி (ஸல்) அவர்கள் கூறினார்கள். அறிவிப்பவர்: அபூஹுரைரா (ரலி) நூல்: புகாரி 1410

இது போன்ற சின்னச் சின்னச் செயல்கள் ஏராளமான நன்மைகளைப் பெற்றுத் தரக் கூடியதாக உள்ளன. அவற்றை நாம் செய்து நன்மை செய்யும் நல்லடியார்களாக அல்லாஹ் நம்மை ஆக்கி வைப்பானாக!

காலம் சொல்லும் பாடம்

காலம் சொல்லும் பாடம்

ரஃபிக் ஜக்கரியா - ஐக்கிய அமீரகம்

வானத்திலிருந்து மழையை இறக்கி அதனைக்கொண்டு பூமியை அது இறந்ததன் பின் உயிர்ப்;பவன் யார்? என்று நீர் அவர்களைக் கேட்பீராயின், அல்லாஹ் என்று அவர்கள் நிச்சயமாகக் கூறுவார்கள், (அதற்கு) 'புகழைத்தும் அல்லாஹ்வுக்கே உரியது என்று நீர் கூறுவீராக! எனினும் அவர்களில் பெரும்பாலோர் (இதனை) அறிந்து கொள்ள மாட்டார்கள். சங்கைமிகு அல்குர்ஆன் 29:63

கடந்த சில வாரங்களாக ஐக்கிய அமீரகத்தின் பகுதிகளான துபாய், அபுதாபி, அஜ்மான், ஷார்ஜா, அல்அய்ன், ராஷ்அல்கைமா, உம்மல் குய்ன், ஃபுஜைரா போன்ற இடங்களிலும் மற்றும் மஸ்கட், கத்தார் போன்ற நாடுகளில் நல்ல மழை பெய்தது என்பதினை நாம் அறிந்து இருப்போம். அல்ஹம்துலில்லாஹ்..

அல்லாஹ்வின் நாட்டப்படி மொஹரம் மாதத்தின் முதல் வாரத்திலிருந்து இந்த மழையானது பெய்ய ஆரம்பித்தது. இதனால் அமீரக சாலைகள் மழை நீரால் மிதந்தது. நம்ம ஊரில் மழை பெய்தால் மழை தண்ணீர் செல்வதற்கு உரிய வழிமுறைகள் இருக்கிறது. ஆனால் வளைகுடா நாடுகளில் மழை பெய்தால் தண்ணீர் செல்வதற்கு உரிய எந்த வழிமுறைகளையும் அரசாங்கம் செய்யவில்லை. ஆகையால் மழை நீர் வடிகால் வசதியில்லாத காரணத்தால் ஆங்காங்கே நீர் தேக்கம் ஏற்பட்டது இதனால் பல வாகனங்கள் அங்கேங்கே சாலைகளில் நின்று விட்டது. சாலைகளில் வாகனங்கள் நின்றதால் போக்குவரத்துகள் பல மணி நேரங்கள் பாதிக்கப்பட்டு பல நிறுவனங்களில் பணிகள் முடக்கப்பட்டது. சென்ற வாரம் அமீரகத்தில் மழையின் காரணத்தால் பள்ளி மற்றும் நிறுவனங்களுக்கு மூன்று நாட்கள் விடுமுறையும் விடப்பட்டது. இதனால் பல இழப்பீடுகள் வளைகுடா நாடுகளுக்கு ஏற்பட்டது. தற்போது எந்த வருடத்திலும் இல்லாத அளவிற்கு கடுமையான குளிர் பிரதேசம் போல் அமீரக நாடுகள் ஆகிவிட்டன என்பதினையும் இங்குள்ளவர்கள் அறிவார்கள். அமீரக பகுதிகளில் 6 டீகிரி செல்ஷியஸ் வரை குளிரானது இருந்தது. 

சில வாரங்கள் பெய்த மழைக்கே பல திர்ஹம் பாதிப்புள்ள பொருட்கள் நஷ்டம் அடைந்து விட்டன. அத்துடன் மண்ணுடன் கலந்து 38 – 52 knots என்ற அளவில் பாலைவனக்காற்றும் அமீரகம் முழுவதும் அடித்தது என்பதினை பலர் அறிவார்கள். இதனால் இங்கு பல பாதிப்புகள் ஏற்பட்டன. மழை மற்றும் பாலைவனக்காற்றினால் தரையில் மட்டும் பாதிப்பு இல்லை. கடலிலும் பாதிப்புகள் ஏற்பட்டன. எப்படியென்றால் கடல்கொந்தளிப்போ, சுனாமியோ, கொனோவோ (சில மாதங்களுக்கு முன்பு மஸ்கட் நாட்டில் கடல் அலைகள் வேகமாக வீசி அதனால் கடல் நீர் ஊருக்குள் வந்து பல பாதிப்புகளை ஏற்படுத்தியது அதற்கு பெயர் - கொனோ என்று அழைத்தார்கள்) ஏற்படவில்லை. அல்லாஹ்வின் கோபப்பார்வையால் 1.2.08 அன்று வெள்ளிக்கிழமையன்று மண்ணுடன் கலந்த பயங்கர குளிர் காற்றானது அமீரக எங்கும் அடித்தது. அமீரக நாட்டில் மட்டுமல்லாமல் ஐரோப்பா நாடுகளிலும் தற்போது கடும் குளிர் காற்று, பனிமூட்டம், பனி மழையானது பொழிந்துக்கொண்டு இருக்கிறது. இதனால் அமெரிக்கா, லண்டன், இல்லினாய்ஸ், மிசிசிபி, சீனா, காஷ்மீர் போன்ற நாடுகளில் மிகப்பெரும் பொருட் சேதங்களும், உயிர் சேதங்களும் ஏற்பட்டுக்கொண்டு இருக்கின்றன. 

சென்ற சில நாட்களாக அமீரகத்தின் பல பகுதிகளில் இலேசாக நில நடுக்கங்கள் அபுதாபி, ஷார்ஜா, ஃபுஜைரா, மாஷாஃபி, டிப்பா, கொர்பகான் மற்றும் உள்ள பகுதிகளில் ஏற்பட்டது. இதனால் சில பாதிப்புகள் அமீரக பகுதிகளில் ஏற்பட்டு உள்ளன. 3.1.08 அன்று ஆப்ரிக்கா நாட்டில் காங்கோ மற்றும் ரவண்டா போன்ற பகுதிகளில் பூகம்பம் ஏற்பட்டு 34 உயிர்கள் பிரிந்தன. பல பொருட் சேதங்களும் அந்நாட்டில் ஏற்பட்டது.

தொலைதொடர்பு வசதிக்காக வேண்டி அமீரகம் மற்றும் மஸ்கட் நாடுகளில் இடையே கடலுக்கு அடியில் போடப்பட்ட (Under Sea Cable)  இணைப்புகளானது 1.2.08 அன்று துண்டிக்கப்பட்டன. இந்த துண்டிப்பானது துபாய் நாட்டிலிருந்து 55 கிலோ மீட்டர் தூரம் உள்ள கடல் பகுதியில் ஏற்பட்டது. ஆகையால் துபாய் நாட்டிலிலும் மற்றும் ஓமன் நாட்டிலும் பல பகுதிகளில் தொலைதொடர்புகள், இணையத்தளம் வசதிகள் மற்றும் உள்ள தொலைத்தொடர்புகள் அனைத்தும் பாதிக்கப்பட்டன. கடலுக்கு அடியில் தொலைதொடர்பு இணைப்பு பணிகளை செய்து இருப்பவர்கள் பிரிட்டன் நாட்டினை சார்ந்த FLAG – FALCON  என்ற நிறுவனங்களாகும். இந்த நிறுவனத்தினை சார்ந்தவர்கள் மேலும் குறிப்பிடுகையில், எகிப்து நாடு மற்றும் இத்தாலி நாடுகளிடையே உள்ள இதுபோல் உள்ள இணைப்புகளும் துண்டிக்கப்பட்டன. எகிப்து நாட்டில் அலக்ஸாண்டாரியா என்ற இடத்திலிருந்து பதினைந்து கிலோ மீட்டர் தூரத்தில் இந்த பாதிப்பு ஏற்பட்டது. அமீரகத்தில் உள்ள ETISALAT மற்றும் DU தொலைதொடர்பு நிறுவனங்கள் இந்த நிறுவனத்துடன் தொடர்புகள் செய்து இருப்பதால் இந்த இரண்டு நிறுவனங்களின் தொலைபேசி இணைப்புகளும் இதனால் பல பாதிப்புகளை அடைந்தது என்றார்கள். 

இந்த கடல் மார்க்கத்தில் ஏற்பட்ட துண்டிப்பால் அமீரக நாட்டில் மட்டும் 1.7 மில்லியன் இணையத்தளம் உபயோகப்படுத்துவோர் இணையத்தளம் தொடர்பு இல்லாமல் பாதிக்கப்பட்டனர். மற்றும் 60 மில்லியன் மக்கள் இந்தியாவிலும், 12 மில்லியன் மக்கள் பாகிஸ்தானிலும், 6 மில்லியன் மக்கள் எகிப்து நாட்டிலும், 4.7 மில்லியன் மக்கள் செளதி அரேபியாவிலும் பாதிக்கப்பட்டனர் என்பதினை அமீரக ஊடகமான கலீஜ் டைம்ஸ் தன்னுடைய 5.2.08 அன்றைய பத்திரிகையில் முதல் பக்க செய்தியாக வெளியிட்டு இருந்தது. 

துபாய் நாட்டில் 11வது சுற்று சூழல் தினமானது (National Environment Day)  4.2.08 திங்கள் அன்று துவங்கப்பட்டது. இந்த நிகழ்ச்சியில் உரையாற்றிய துணை பிரதமரும் மற்றும் சுற்றுப்புற சூழல் அமைப்பின் சேர்மனுமாகிய ஷேக் ஹம்தான் பின் சையத் அல் நாஹியான் (Shaikh Hamdan Bin Zayed Al Nahyan)  அவர்கள் குறிப்பிடுகையில், தற்போது உலகில் பல வடிவங்களில் மாசுவானது படிந்து உள்ளது. இதனால் மாசுபடிந்த நீர், காற்று, சுற்றுப்புறம் போன்றவைகளிலிருந்து மக்களை பாதுகாக்க வேண்டி உலக முழுவதும் டாலர் மதிப்பின் 150 மில்லியன் தேவைப்படுகிறது என்றார். (செய்தி பார்க்க - அரபு செய்தி பத்திரிகை - பக்கம் 6 - தேதி 5.2.08) 

மழைகளால் பாதிப்பு, காற்றால் பாதிப்பு, தொலை தொடர்பு துண்டிப்பால் ஏற்பட்ட பாதிப்பு போன்றவைகள் செய்திகளாக இருந்தாலும் அதனை நாம் ஏதோ ஒரு சாதாரண விஷயமாக எடுத்து கொள்ள கூடாது. இதனால் என்ன பாதிப்பு ஏற்பட்டு விட போகிறது என்று நாம் சிந்தித்தால் பல கோடி இழப்புகளானது சாதாரணமாகவே ஒவ்வொரு நாதட்டிலும் ஏற்பட்டு இருக்கும் என்பதில் சந்தேகமில்லை. ஏனெனில் அல்லாஹ்வின் கோபப்பார்வை எந்த நேரத்தில், எந்த இடத்தில், எந்த காலத்தில் வரும் என்று நம்மால் யாராலும் சொல்ல முடியாது. எல்லாம் அறிந்தவன் அல்லாஹ் தான். வானமும், பூமியும், காற்றும், மழையும், கடலும் மற்றும் உள்ள அனைத்தும் அல்லாஹ்வின் கட்டளைப்படி நடக்கின்றன. 

மனிதர்களின் கைகள் சம்பாதித்த (தீய) வற்றின் காரணமாகக் கரையிலும், கடலிலும் (அழிவு) குழப்பம் வெளிப்பட்டு விட்டன. அவர்கள் செய்த(தீய)வற்றில் சிலவற்றை அவர்களுக்கு அவன் சுவைக்கும்படி செய்வதற்காக (இவ்வாறு) சோதிக்கிறான். அதன் மூலம் அவர்கள் (தவ்பாச் செய்து அவன் பால்) திரும்பி விடலாம். அல்குர்ஆன் 30:41

ஒரு மனிதன் அல்லது ஒரு சமுதாயம் வெறும் உலக செல்வச்செழிப்பில் மிதப்பதை அல்லது அதிகார பீடத்தில் அமர்ந்திருப்பதைப் பார்த்து அல்லாஹ் இத்தகைய மக்களின் விஷயத்தில் திருப்தி கொண்டு விட்டான் எனக்கூறுவது சரியல்ல. மாறாக, இது கடுமையான சோதனை மற்றும் வேதனைக்குரிய ஒரு நிலையே ஆகும். இதன் பிறகு இறைவனின் வேதனை தீடிரென வந்து அந்தக்குற்றவாளிகளை பிடித்துக்கொள்கிறது. அல்லாஹ் ஒவ்வொன்றிற்கும் காலஅவகாசம் கொடுப்பான். மீன் பிடிப்பவன் மீன்வாயில் முள் சிக்கிய உடனே தூண்டிலை வெளியே இழுத்து விடுவதில்லை. மாறாக, கொஞ்ச நேரம் அதன் போக்கில் விட்டு விடுகிறான். அந்த மீன் அங்குமிங்குமாய் சுற்றி களைத்து போகும் போது தீடிரென வேகமாக அதனை வெளியே இழுத்து தரைக்கு கொண்டு வந்து விடுகின்றான். ஆனால் அந்த இடைப்பட்ட நேரத்தில் அந்த அப்பாவி மீன் சுதந்திரச்சூழலில் சொகுசாக இருப்பதாக நினைத்துக்கொண்டிருக்கும். மீனுடைய வாழ்க்கை எப்படியோ அது போல் மனிதனுடைய வாழ்க்கையும் இருக்கிறது. அல்லாஹ் ஒரு மனிதனுக்கு எல்லா வசதிகளையும், செல்வங்களையும் கொடுத்து அவன் அதனை கொண்டு எப்படி வாழ்கிறான் என்பதில் சோதனை செய்வான்.

பாகிஸ்தான் மற்றும் பங்காதேஷ் நாடுகளில் தற்போது H 5 N 1 என்ற பறவைகள் நோய்கள் (Bird Flu)  பரவி விட்டன. இதனால் அந்த நாட்டில் பல கோடிகள் நஷ்டம். மேற்குறிப்பிட்ட இரண்டு நாடுகளில் 3.38 மில்லியன் பறவைகள் பாதிக்கப்பட்இதற்கு முன்பாக இந்தோனிஷியா மற்றும் செளதி அரேபியாவிலும் பறவைகள் நோய் ஏற்பட்டன. அங்கும் பாதிப்புகள். 

பயங்கர ஆயுதங்கள் பதுங்கப்பட்டுள்ளன என்ற காரணம் காட்டி ஈராக் மீது தொடுக்கப்பட்ட அநியாய போரால் இன்றும் பல இழப்பீடுகள். இந்த இழப்பீடுகள் போதாது என்று, ஈராக் மற்றும் ஆப்கானிஸ்தானை அழிக்க இன்னும் பல கோடிகளை செலவு செய்ய அமெரிக்கா தயாராகி விட்டது 2009 ஆண்டின் போர் கால பட்ஜெட்டாக 588.3 பில்லியன் டாலர்களை செலவு செய்ய அமெரிக்கா நாடாளுமன்றம் தயாராகி விட்டது. அக்டோபர் மாதம் முதல் தவணையான 70 பில்லியன் அவசர கால தேவைக்காக அவசியப்படுகிறது என்று கூறுகிறார் மனிதப்பசி பிடித்த அமெரிக்க அதிபர் புஷ்.

அமெரிக்கா ஒரு பக்கம் என்றால் இஸ்ரேல் இன்னொரு பக்கம் மனித உயிர்களுக்கு பல பாதிப்புகளை அதிகமாக தருகிறது. பாலஸ்தீனம் மற்றும் காஸா மற்றும் மேற்குக்கரை பகுதிகளில் உணவு பொருட்கள், மின்சாரம், குடிதண்ணீர் போன்ற அத்தியாவசிய பொருட்கள் இல்லாமல் பல உயிர்கள் மாய்ந்து வருகிறது. காஸா எல்லைப்பகுதிகளை மூடிவைத்து விட்டு வேடிக்கை பார்க்கிறது ஆதிக்கச்சக்திகள். இதனால் உணவு தட்டுப்பாடு மற்றும் அத்தியாவசிய பொருட்கள் அங்கு கிடைக்காமல் பல அவஸ்தைகள் நாள்தோறும்.

4.2.08 அன்று அறுபதாவது சுதந்திர தின கொண்டாடங்கள் ஒரு பக்கம் இலங்கையில் ஆடம்பரமாக, ஆனால் மக்கள் சுதந்திரமாக இல்லாமல் அகதிகளாக சுற்றி வருகிறார்கள் சொந்த நாட்டில். தினந்தோறும் வெடி சப்தங்கள் எங்கள் தாய்த்;திருநாட்டில் என்று சொல்லக்கூடிய அளவில் உள்ளது இலங்கை. உள் நாட்டு போரா.. அல்லது வெளி நாட்டு போரா.. என்று தெரியாமல் பல நஷ்டங்கள் அந்த நாட்டில். 

தேர்தல் வந்தால் அமைதி ஏற்படும் என்ற காரணத்தினை காட்டி பாகிஸ்தானில் அமைதியினை குலைத்த ஆதிக்கச்சக்திகளால் பல டாலர்கள் மதிப்பு உள்ள பாதிப்புகள் பாகிஸ்தானில். இது போல் பல பாதிப்புகளை பல நாடுகளும் அடைந்துகொண்டு தான் வருகின்றன நாள்தோறும்.

இஸ்ரேலிய கூலிப்படைக்கு ஆதரவாக இந்தியா ஏவுகணை தளத்தினை ஆதிக்கச்சக்திக்கு கொடுத்து இருந்தது.ஜனவரி 21ம்தேதி ஸ்ரீஹரிகோட்டாவிலிருந்து இஸ்ரேலிய ஏவுகணை விண்ணில் பறக்க விடப்பட்டது. இதனை கண்ட ஈரான் நாடும் சும்மா இருக்கவில்லை. ஈரான் நாட்டின் பாலை வனத்தின் வட பகுதியில் சோதனை ஏவுகணை ஒன்றினை செய்து இருக்கிறது. இந்த சோதனை ஏவுகணையானது மே மாதம் அல்லது ஜுன் மாதம் விண்ணில் செலுத்துப்படும் என்று அங்குள்ள விண் வெளி ஆராய்ச்சியாளர்கள் தெரிவிக்கிறார்கள். இந்த ஏவுகணை பற்றிய செய்தியினை ஈரான் நாட்டு தொலைக்காட்சியானது படம் பிடித்து 3.2.08 அன்று வெளியிட்டு இருந்தது. அத்துடன் இஸ்ரேலுக்கு இந்தியாவில் ஏவுகணைக்காக இடம் கொடுத்ததால் நடுநிலையாளர் போராட்டங்களையும் செய்தனர் என்பதினையும் நாம் அறிவோம். 

அத்துடன் டில்லியில் உள்ள ஈரான் தூதரகத்திற்கு, இந்தியாவிற்கு ஏதிரான கடிதம் ஒன்றும் ஈரான் நாட்டு மக்களிடமிருந்து வந்துள்ளது என்றும் ஊடகத்துறைகள் தெரிவிக்கின்றன. ஈரான் நாடானது இந்தியாவிடம் வைத்துள்ள எண்ணெய் வர்த்தக தொடர்பானது துண்டிக்க படுமா..? என்ற வினாக்களும் பல பேரின் மத்தியில் தெரிகிறது. ஈரான் தன்னுடைய எண்ணெய் வர்த்தக தொடர்பினை துண்டித்தால் இந்தியாவானது பல பாதிப்புக்கும் உள்ளாகும் என்பது திண்ணமே. 

மழை, கடும் பனி, புயல் காற்று, சுற்றுப்புற சூழல் பாதிப்பு போன்றவற்றினை நாம் பார்க்கும் போது, அல்லாஹ்வை பற்றிய பயமும் உள்ளச்சமும் நமக்கு மேன் மேலும் அதிகரிக்க வேண்டும். திருக்குர்ஆனை இத்தகைய தருணங்களில் அதிகமதிகமாக ஒதக்கூடிய மக்களாக நாம் இருக்க வேண்டும். இல்லையென்றால் நாம் நஷ்டம் அடையக்கூடியவர்களாக தான் இருப்போம்.

மனிதன் எப்போதும் நஷ்டத்தில் தான் இருப்பான் என்பதினை திருமறையானது தன்னுடைய அல் அஸ்ர் 103 அத்தியாயத்தில் மிகவும் அழகாக கூறுகிறது.

காலத்தின் மீது சத்தியமாக..

நிச்சயமாக மனிதன் நஷ்டத்தில் இருக்கிறான்.

விசுவாசங்கொண்டு, நற்கருமங்களையும் செய்து சத்தியத்தை ஒருவருக்கொருவர் உபதேசம் செய்தும் (பாவங்களை விடுவதிலும், நன்மைகளைச்; செய்வதிலும் எற்படும் கஷ்டங்ளைச் சகித்து) பொறுமையைக் கொண்டும் ஒருவருக்கொருவர் உபதேசிக்கிறார்களே அத்தகையோரைத்தவிர. அல்குர்ஆன் 103 : 1,2,3

http://www.idhuthanislam.com/podu1/kaalam-paadam.htm